నందమూరి కల్యాణ్ రామ్ హీరోగా వశిష్ట దర్శకత్వంలో తెరకెక్కిన బింబిసార చిత్రం గత ఏడాది హిట్ టాక్ తో కలెక్షన్ల వర్షం కురిపించిన సంగతి తెలిసిందే. సీతారామంతో పాటు బింబిసార చిత్రాలు హిట్ కావడంతో అప్పటిదాకా ఓటీటీల దెబ్బకు ఉక్కిరిబిక్కిరి అవుతున్న టాలీవుడ్ ఊపిరి పీల్చుకుంది. ఈ క్రమంలోనే తాజాగా మరో క్రేజీ ప్రాజెక్ట్ తో కల్యాణ్ రామ్ ప్రేక్షకుల ముందుకు రాబోతున్నారు. డిఫరెంట్ కాన్సెప్ట్ లకు ఎప్పుడూ పెద్దపీట వేసే కల్యాణ్ రామ్ ‘అమిగోస్’తో ప్రేక్షకులను అలరించేందుకు సిద్ధమయ్యారు.
మైత్రీ మూవీస్ వారు భారీ బడ్జెట్ తో ప్రతిష్టాత్మకంగా తెరకెక్కించిన ఈ చిత్రానికి రాజేంద్ర రెడ్డి దర్శకత్వం వహించారు. ఈ సినిమాలో కల్యాణ్ రామ్ మూడు డిఫరెంట్ లుక్స్ తో కనిపించనున్నాడు. మనిషిని పోలిన మనుషులు ఏడుగురు ఉంటారన్న కాన్సెప్ట్ తో రూపొందించిన ఈ చిత్రంలో ఆషిక రంగనాథ్ కథానాయికగా పరిచయమవుతోంది. గిబ్రాన్ సంగీతాన్ని సమకూర్చిన ఈ సినిమాను ఫిబ్రవరి 10న విడుదల చేయబోతున్నారు. విడుదల తేదీ దగ్గర పడుతున్న నేపథ్యంలో ప్రమోషన్స్ జోరు పెంచింది చిత్ర యూనిట్. ఈ నేపథ్యంలోనే ఈ రోజు కర్నూల్ లోని శ్రీరామ థియేటర్లో ట్రైలర్ లాంచ్ ఈవెంట్ నిర్వహించారు.
ట్రైలర్ రిలీజ్ చేసిన అనంతరం కల్యాణ్ రామ్ ఆసక్తికర వ్యాఖ్యలు చేశారు. కొత్తదనంతో తాను ఇంతవరకూ చేసిన సినిమాలను ప్రేక్షకులు, నందమూరి అభిమానులు ఆదరిస్తూనే వచ్చారని, అలాగే ‘అమిగోస్’ ను కూడా అద్భుతంగా తెరకెక్కించి వారి ముందుకు తీసుకుని వస్తున్నానని చెప్పారు. సినిమా విషయంలో నమ్మకంగా ఉన్నానని, థియేటర్ కి వచ్చినవారెవరూ నిరాశతో తిరిగెళ్లరని కల్యాణ్ రామ్ అన్నారు. ఎల్లుండి జరగబోయే ఈ సినిమా ప్రీ రిలీజ్ ఈవెంట్ చీఫ్ గెస్టుగా జూ.ఎన్టీఆర్ వస్తున్నాడని, ఆ రోజున మిగతా విషయాలు మాట్లాడుకుందామని అన్నారు.
‘మనిషిని పోలిన మనుషులు ఎదురుపడితే అరిష్టం’ .. ‘మనం ఫ్రెండ్స్ కాదు .. బ్రదర్స్ అంతకన్నా కాదు’ .. ‘రాక్షసుడిని తీసుకొచ్చి ఇంట్లో పెట్టావు కదరా’ అనే డైలాగ్స్ ఈ సినిమాపై ఆసక్తిని పెంచుతున్నాయి. ఇండియన్ పాబ్లో ఎస్కోబార్ అనే నెగెటివ్ షేడ్స్ ఉన్న డ్రగ్స్ లార్డ్ పాత్రలో కూడా కల్యాణ్ రామ్ నటించారు. తనని పోలిన మనుషుల వలన హీరో చిక్కుల్లో పడడం అనే కాన్సెప్ట్ తో ఈ కథ సాగబోతోందని ట్రైలర్ చూస్తే అర్థమవుతోంది.
