జూనియర్ ఎన్టీఆర్…టాలీవుడ్ లోని స్టార్ హీరోలలో ఒకడిగా వెండితెరపై వెలిగిపోతున్న అగ్ర కథానాయకుడు. ఓ వైపు వరుస సినిమాలతో బిజీగా ఉంటూ వెండితెర ప్రేక్షకులను అలరిస్తోన్న తారక్… ‘బిగ్ బాస్’ వంటి రియాలిటీ షోకు హోస్ట్ గా వ్యవహరించి బుల్లితెర ప్రేక్షకులనూ ఆకట్టుకున్నాడు. ‘ఆర్ఆర్ఆర్’ వంటి భారీ పాన్ ఇండియా మల్టీ స్టారర్ లో కొమురం భీంగా నటిస్తోన్న తారక్…మరోవైపు జెమినీ టీవీలో త్వరలో ప్రసారం కాబోతోన్న ‘ఎవరు మీలో కోటీశ్వరులు’ అనే రియాలిటీ షోకు హోస్ట్ గా వ్యవహరిస్తున్నాడు. ఈ నేపథ్యంలోనే తాజాగా విడుదలైన ‘ఎవరు మీలో కోటీశ్వరులు’ కర్టన్ రైజర్ వీడియోలోనూ తారక్ అదరగొట్టాడు.
తారక్ హోస్ట్ గా జెమినీ టీవీ ప్రతిష్టాత్మకంగా రూపొందించిన ‘ఎవరు మీలో కోటీశ్వరులు’ ప్రోగామ్ ఎప్పటి నుంచి ప్రసారం అవుతుందో అన్న విషయంపై తారక్ తాజాగా క్లారిటీ ఇచ్చేశాడు. ‘వస్తున్నా..ప్రతి ఇంటికి వచ్చేస్తున్నా…ఎవరు మీలో కోటీశ్వరులు’ అంటూ తారక్ చెప్పిన డైలాగ్ తో ఈ ప్రోెగ్రాం కర్టెన్ రైజర్ వీడియా ఈ రోజు విడుదలైంది. ఈ నెల 23వ తేదీ సోమవారం నుంచి ఈ కార్యక్రమం ప్రారంభంకానుంది. ప్రతి సోమవారం నుంచి గురువారం వరకూ రాత్రి 8.30 గంటలకు జెమినీ టీవీలో ఈ షో ప్రసారం కానుండగా, ఆగస్టు 22న ఈ షో కర్టన్ రైజర్ కార్యక్రమం ప్రసారం కానుంది.
వాస్తవానికి ఆగస్టు 15 నుంచి ఈ కార్యక్రమం ప్రారంభమవుతుందని టాక్ వచ్చింది. కానీ, సెప్టెంబరు 5 నుంచి బిగ్ బాస్-5 షో ప్రారంభం కానున్న నేపథ్యంలో దీనిని ఆగస్టు 23న మొదలుపెట్టబోతున్నారు. స్టార్ మాతో జెమినీ ఢీ అంటే ఢీ అనబోతోన్న నేపథ్యంలోనే ఈ తేదీల్లో మార్పు వచ్చిందని టాక్. ‘కౌన్ బనేగా కరోడ్ పతి’ టీవీ షో ఇప్పటివరకు తెలుగులో ‘మీలో ఎవరు కోటీశ్వరుడు’ పేరుతో మాటీవీలో ప్రసారమైంది. ఇప్పటివరకు తెలుగులో నాలుగు సీజన్లు జరిగాయి.
2014 జూన్‌లో నాగార్జున హోస్ట్‌గా ఈ షో తొలి సీజన్, 2014 డిసెంబర్‌లో రెండో సీజన్, 2015 నవంబర్‌లో మూడో సీజన్ ప్రసారమైంది. 2017లో ప్రసారమైన నాలుగో సీజన్ కు మెగాస్టార్ చిరంజీవి హోస్ట్ గా వ్యవహరించారు. అయితే, తాజాగా ఈ కార్యక్రమానికి ‘ఎవరు మీలో కోటీశ్వరులు’ అని పేరు మార్చగా…ఈ షో తొలి సీజన్ కు తారక్ హోస్ట్ గా వ్యవహరిస్తున్నాడు. ”కథ మీది…కల మీది… ఆట నాది…కోటి మీది…ఇక్కడ మనీతో పాటు మనసులు గెలుచుకోవచ్చు…రండి గెలుద్దాం…. ‘ఎవరు మీలో కోటీశ్వరులు” అంటున్న తారక్ ఈ షోతో మరోసారి బుల్లితెర ప్రేక్షకులను అలరిస్తాడనడంలో ఎటువంటి సందేహం లేదు.
