చంద్రబాబు హయాంలో జరిగిన అభివృద్ధి ఇది అని..జగన్ పాలనలో ఏమీ చేయలేదని చాటి చెప్పేలా టీడీపీ జాతీయ ప్రధాన కార్యదర్శి నారా లోకేష్ కొంతకాలంగా సెల్ఫీ ఛాలెంజ్ పేరుతో జగన్ కు వైసీపీ నేతలకు సవాల్ విసురుతున్న సంగతి తెలిసిందే. ఈ క్రమంలోనే తాజాగా ఆ సవాల్ పై సీఎం జగన్ స్పందిస్తూ ఆసక్తికర వ్యాఖ్యలు చేశారు. సెల్ఫీ చాలెంజ్ అంటే నాలుగు ఫేక్ ఫొటోలు కాదని జగన్ షాకింగ్ కామెంట్లు చేశారు.
రాష్ట్రంలోని పేదవాడి ఇంటి ముందు నిలబడి గత ప్రభుత్వం చేసిన మంచి ఇదీ అని చెప్పగలగాలని అన్నారు. ఆ మంచిని చిరునవ్వుతో ఆశీర్వదించి ఆ కుటుంబం తీసుకున్నది గొప్ప సెల్ఫీ అవుతుందని చెప్పారు. గత ప్రభుత్వ హయాంలో చేసిన మంచిపని ఇదీ అని ప్రతి ఇంటిముందు నిలబడి సెల్ఫీ తీసుకోగలరా అని చంద్రబాబుకు జగన్ సవాల్ విసిరారు. మార్కాపురంలో జరిగిన ఈబీసీ నేస్తం నిధుల విడుదల కార్యక్రమంలో జగన్ ఈ వ్యాఖ్యలు చేశారు.
ఈ ప్రభుత్వ హయాంలో నాలుగేళ్లలో జరిగిన మంచి ఎంత అని అడిగి తెలుసుకోవాలని చంద్రబాబును ఉద్దేశించి జగన్ చేసిన వ్యాఖ్యలు చర్చనీయాంశమయ్యాయి. అలా మంచిని బేరీజు వేసుకుని చూసే సత్తా నీకు ఉందా బాబూ? అని జగన్ ఛాలెంజ్ చేశారు. ఎవరి హయాంలో ఏం జరిగిందని, మేలు చేసే ప్రభుత్వం ఏదనేది ప్రజలకు తెలుసని జగన్ అన్నారు.
