జనసేన అధినేత పవన్ కళ్యాణ్ పై సీఎం జగన్ ఎన్నోసార్లు వ్యక్తిగత విమర్శలకు దిగిన సంగతి తెలిసిందే. పవన్ ను రాజకీయపరంగా ఎదుర్కోలేక ఆయన వ్యక్తిగత జీవితంపై జగన్ విమర్శలు చేస్తున్నారని జనసేన నేతలు ఆరోపిస్తున్నారు. అయితే ఆ ఆరోపణలో కూడా జగన్ లెక్క తప్పుతున్నారు. పవన్ కళ్యాణ్ మూడు పెళ్లిళ్లు చేసుకోగా జగన్ మాత్రం పవన్ నాలుగు పెళ్ళిళ్ళు చేసుకున్నారు అంటూ తాజాగా విమర్శించడం చర్చకు దారితీసింది. ఇప్పటికే, పాలకొల్లు, గాజువాక, భీమవరం, పిఠాపురం స్థానాల్లో పోటీ చేసేందుకు పవన్ పోటీచేశారని, నాలుగు పెళ్లిళ్లు, నాలుగు నియోజకవర్గాలు అంటూ పవన్ పై జగన్ తాజాగా సెటైర్లు వేశారు.
ఈ క్రమంలోనే జగన్ పై సోషల్ మీడియాలో ట్రోలింగ్ జరుగుతోంది. సీఎం స్థాయి వ్యక్తి పవన్ వ్యక్తిగత జీవితం పెళ్లిళ్లపై విమర్శలు చేయడం సరికాదని, చివరకు ఆ పెళ్లిళ్ల లెక్క విషయంలోనూ తప్పుడు లెక్కలు చెప్పడం అంతకన్నా సరికాదని నెటిజన్లు విమర్శలు గుప్పిస్తున్నారు. అంతకుముందు, పవన్ కళ్యాణ్ పిఠాపురానికి నాన్ లోకల్ అని వైసీపీ అభ్యర్థి వంగా గీత లోకల్ అని జగన్ వ్యాఖ్యానించారు. ఎన్నికలు పూర్తయిన వెంటనే పవన్ కళ్యాణ్ పిఠాపురం వదిలి హైదరాబాద్ వెళ్ళిపోతారని విమర్శించారు. పవన్ కళ్యాణ్ ఒక సినిమా హీరో అని, వంగా గీత లోకల్ హీరో అని ఇద్దరిలో ఎవరు కావాలో పిఠాపురం ప్రజలు తేల్చుకోవాలని జగన్ అన్నారు.
అయితే, జగన్ వ్యాఖ్యలకు పవన్ కౌంటర్ ఇచ్చారు. తాను పిఠాపురానికి నాన్ లోకల్ అంటున్న జగన్ 70 నియోజకవర్గాలలో నాన్ లోకల్ అభ్యర్థులను ఎలా ప్రకటించారని పవన్ ప్రశ్నించారు. కానీ, పవన్ కళ్యాణ్ ప్రశ్నకు జగన్ సమాధానమివ్వలేదు.
