టాలీవుడ్ లో ఐటం గర్ల్ గా అభినయశ్రీ తనదైన ముద్ర వేసిన సంగతి తెలిసిందే. అభి, ఆర్య సినిమాలో ఐటం సాంగ్స్ తో ఈ డస్కీ బ్యూటీ పాపులర్ అయింది. ఆర్య సినిమాలో బన్నీతో కలిసి స్టెప్పులేసిన అభినయ శ్రీకి వరుస ఆఫర్లు క్యూ కట్టాయి. ఆ తర్వాత చాలా ఐటం సాంగ్స్ తో పాటు కొన్ని సినిమాల్లో కూడా నటించిన అభినయశ్రీ కొంతకాలంగా సినిమాలకు దూరంగా ఉంటోంది.
ఈ క్రమంలోనే తాజాగా జరుగుతున్న బిగ్ బాస్ తెలుగు ఆరో సీజన్ లో అభినయ శ్రీ పార్టిస్పేట్ చేసింది. అయితే, గత వారం ఎలిమినేషన్లో అభినయశ్రీ ఎలిమినేట్ అయింది. ఈ నేపథ్యంలోనే తన ఎలిమినేషన్ పై అభినయ శ్రీ షాకింగ్ కామెంట్లు చేసింది. తన ఎలిమినేషన్ విషయంలో అన్యాయం జరిగిందని ఆరోపించింది. అంతేకాదు, తనకు సంబంధించిన క్లిప్స్ పెద్దగా బయటకు రాలేదని, ఆ విషయం తనకు ఇప్పుడే తెలిసిందని చెప్పుకొచ్చింది.
తాను దిగాలుగా ఉండటం మాత్రమే చూపించారని, తాను మాట్లాడింది, డాన్స్ చేసింది, వాదించింది ఏదీ టీవీలో చూపించలేదని వాపోయింది. ఈ విషయంలో తాను చాలా నిరుత్సాహపడ్డానని చెప్పుకొచ్చింది. తనకంటే ఓట్లు తక్కువ వచ్చిన వారు కూడా ఎలిమినేట్ కాలేదని, కానీ, తాను ఎలిమినేట్ కావడం ఆశ్చర్యానికి గురిచేసిందని ఆవేదన వ్యక్తం చేసింది.
తన టాలెంట్ ను నిరూపించుకునేందుకే బిగ్ బాస్ లోకి వెళ్ళానని, డే వన్ నుచి తన టాలెంట్ చూపించడం జరగలేదని బాధపడింది. అలా ఎందుకు చేశారో తనకు అర్థం కావడం లేదని బిగ్ బాస్ నిర్వాహకులపై అభినయశ్రీ అసంతృప్తి వ్యక్తం చేసింది.
