వైసీపీ మహిళా నేత లక్ష్మీ పార్వతికి తెలంగాణ హైకోర్టు షాకిచ్చింది. ‘బసవతారకం ట్రస్ట్’కు తనను మేనేజింగ్ ట్రస్టీగా నియమించాలని కోరుతూ లక్ష్మీ పార్వతి దాఖలు చేసిన పిటిషన్‌పై దిగువ కోర్టు ఇచ్చిన ఆదేశాలను హైకోర్టు కొట్టివేసింది. ఈ క్రమంలోనే హైకోర్టు కీలక వ్యాఖ్యలు చేసింది. నోటి మాట ఆధారంగా ఒక వ్యక్తిని సాక్షిగా గుర్తించడం చెల్లదని రాష్ట్ర అత్యున్నత న్యాయస్థానం తేల్చి చెప్పింది.
1995లో ఎన్టీఆర్ ఎగ్జిక్యూట్ చేసినట్లు సప్లిమెంటరీ విల్లును నిరూపించే క్రమంలో సిటీ సివిల్ కోర్టు చట్టం నిర్దేశించిన ప్రొసీజర్‌ను అనుసరించలేదని హైకోర్టు స్పష్టం చేసింది. ఆ విల్లుపై సాక్షి సంతకం చేసిన జె.వెంకటసుబ్బయ్య వారసుడు జేవీ ప్రసాదరావును సాక్షిగా గుర్తిస్తూ దిగువ కోర్టు 2018లో ఇచ్చిన ఆదేశాలను హైకోర్టు తాజాగా కొట్టివేసింది. వెంకట సుబ్బయ్య మరణించారని నోటి మాటగా ఆయన కుమారుడు జేవీ ప్రసాదరావును సాక్షిగా గుర్తించడం చెల్లదని హైకోర్టు తేల్చి చెప్పింది.
ఆ విల్లు ప్రకారం బసవతారకం ట్రస్టుకు లక్ష్మీ పార్వతిని మేనేజింగ్ ట్రస్టీగా నియమించాలని 2009లో లక్ష్మీపార్వతి సిటీ సివిల్ కోర్టును ఆశ్రయించారు. ఆ విల్లులో సంతకం చేసిన వెంకట సుబ్బయ్య మరణించారని, కాబట్టి ఆయన కుమారుడు ప్రసాదరావును సాక్షిగా గుర్తించాలని కోరారు. అది నిజమేనని జేవీ ప్రసాదరావు అఫిడవిట్‌లో పేర్కొన్నారు. ఈ క్రమంలోనే ప్రసాద రావును సాక్షిగా విచారణ జరిపేందుకు సిటీ సివిల్ కోర్టు అంగీకరించింది. ఆ తర్వాత సివిల్ కోర్టు నిర్ణయాన్ని బసవతారకం ట్రస్ట్, నందమూరి బాలకృష్ణ, హరికృష్ణ హైకోర్టులో సవాలు చేశారు. ఈ నేపథ్యంలోనే ఆ విషయంపై విచారణ జరిపిన హైకోర్టు.. దిగువ కోర్టు ఇచ్చిన ఆదేశాలను కొట్టి వేసింది.
