సౌత్ ఇండియా స్టార్ హీరోయిన్ గా గుర్తింపు తెచ్చుకున్న సమంతపై కొంతకాలంగా పుకార్లు వస్తున్న సంగతి తెలిసిందే. కొద్ది నెలలుగా సమంత అమెరికాలో చికిత్స తీసుకుంటోందని ప్రచారం జరుగుతోంది. ఈ నేపథ్యంలోనే తాజాగా ఆ పుకార్లకు సమంత స్వయంగా చెక్ పెట్టింది. తాను అరుదైన మయోసైటిస్ అనే వ్యాధితో బాధపడుతున్నానని సమంత స్వయంగా వెల్లడించింది. అంతేకాదు,కొద్ది నెలల నుంచి ఈ వ్యాధికి ఆటో ఇమ్యూనిటీ కండిషన్ చికిత్స తీసుకుంటున్నానని కూడా సమంత చెప్పింది. అయితే, ఇప్పుడిప్పుడే తాను కోలుకుంటున్నానని, ప్రస్తుతానికి తన ఆరోగ్యం నిలకడగానే ఉందని సమంత వెల్లడించింది.
తాను పూర్తిగా కోలుకునేందుకు ఊహించిన దానికంటే ఎక్కువ సమయం పట్టేట్లు ఉందని చెప్పుకొచ్చింది. తాను త్వరగా కోలుకుంటానని డాక్టర్లు కూడా నమ్మకంతో ఉన్నారని అభిప్రాయపడింది. తన జీవితంలో మానసికంగా, శారీరకంగా మంచి రోజులు, చెడు రోజులు అన్నింటిని చూశానని చెప్పుకొచ్చింది. అటువంటి పరిస్థితులను మళ్ళీ భరించే శక్తి తనకు ఉందో లేదో అనుకున్నానని, కానీ భగవంతుడి దయవల్ల ఆ క్షణాలు పూర్తిగా గడిచిపోయాయని, త్వరలోనే పూర్తిగా కోరుకుంటానని చెప్పింది.
ఇక, యశోద చిత్రానికి డబ్బింగ్ చెబుతున్న సమయంలో కూడా సామ్ చేతికి ఐవీ క్యాన్ లా ఉంది. సెలైన్ ఎక్కించుకుంటూనే డబ్బింగ్ చెబుతున్న ఫొటోను తన సోషల్ మీడియా ఖాతాలో సమంత పోస్ట్ చేసింది. దీంతో, సినిమా అంటే సమంతకు ఉన్న అంకితభావం ఇది అంటూ ఆమె అభిమానులు ప్రశంసిస్తున్నారు. ఏదేమైనా సమంత తాజాగా పెట్టిన పోస్ట్, ఫోటో సోషల్ మీడియాలో వైరల్ గా మారాయి.
సమంత తాజా చిత్రం యశోద విడుదల కోసం ఆమె ఫ్యాన్స్ ఆత్రుతగా ఎదురుచూస్తున్న సంగతి తెలిసిందే. ది ఫ్యామిలీ మ్యాన్ వెబ్ సిరీస్ తో దేశవ్యాప్తంగా పాపులర్ అయిన సమంత చిత్రం కోసం బాలీవుడ్ అభిమానులు కూడా ఆసక్తిగా ఎదురు చూస్తున్నారు. ఆ ఆసక్తిని మరింత పెంచేలాగా ఇటీవల యశోద చిత్రం నుంచి ట్రైలర్ విడుదలైంది. సరోగసి ట్రాఫికింగ్ నేపథ్యంలో, అందులో జరిగే అక్రమాలను బట్టబయలు చేసే యువతి పాత్రలో సమంత నటించింది.
