స్టార్ హీరోలైన ఇద్దరు అన్నదమ్ములు ఒక సినిమాలో కలిసి నటిస్తే అభిమానులకు వచ్చే కిక్కే వేరు. ఐతే తమిళ సూపర్ స్టార్ సూర్య, స్టార్ హీరోగా ఎదిగిన అతడి తమ్ముడు కార్తి ఇప్పటిదాకా ఏ సినిమాలోనూ కలిసి నటించలేదు. సూర్య ద్విపాత్రాభినయం చేసిన ‘బ్రదర్స్’ సినిమాలో ఒక పాత్రకు కార్తి డబ్బింగ్ చెప్పాడు కానీ.. అన్నయ్యతో స్క్రీన్ మాత్రం షేర్ చేసుకోలేదు. ఐతే ఎట్టకేలకు వీళ్లిద్దరినీ ఒకే సినిమాలో చూసే అవకాశం రాబోతోంది. సూర్య కెరీర్లోనే అత్యంత ప్రతిష్టాత్మకంగా, భారీ బడ్జెట్లో తెరకెక్కుతున్న ‘కంగువ’లో కార్తి కూడా తళుక్కుమనబోతున్నాడు. కొన్ని రోజులుగా దీని గురించి వార్తలు వస్తుండగా.. ఈ చిత్రానికి తమిళంలో లిరిసిస్ట్‌గా పని చేస్తున్న వివేక్.. ఈ విషయాన్ని ధ్రువీకరించాడు.
ఓ ఇంటర్వ్యూలో భాగంగా ‘కంగువ’లో కార్తి నటిస్తుండడం నిజమా అని అడిగితే.. ప్రొడక్షన్ హౌస్ అనుమతి లేకుండా ఈ విషయం చెప్పొచ్చో లేదో నాకు తెలియదు, కానీ కార్తి క్యామియో రోల్‌లో కనిపిస్తాడు అని బదులిచ్చాడు వివేక్. ఈ న్యూస్ సోషల్ మీడియాలో వైరల్ అయింది. ‘కంగువ’ చిత్రం ఒక మల్టీవర్స్‌లా ఉంటుందని.. వేరే సినిమాల్లోని ఐకానిక్ క్యారెక్టర్స్ ఇందులో కనిపిస్తాయని అంటున్నారు. ‘కంగువ’ సినిమా శైలి చూస్తే.. ఇందులో ‘కార్తి’ కాష్మోరా సినిమాలోని రాజ్ నాయక్ పాత్రలో ఏమైనా కనిపిస్తాడా అనే సందేహాలు కలుగుతున్నాయి.
‘కంగువ’లో సూర్య లుక్.. ‘కాష్మోరా’లో కార్తి లుక్ కొంచెం తగ్గరగా అనిపిస్తాయి. కథాంశం పరంగా కూడా ఈ రెండు చిత్రాల్లో పోలికలు ఉండే అవకాశం కనిపిస్తోంది. ఐతే కార్తి ఎలా కనిపించినా.. అన్నదమ్ములిద్దరినీ ఒకే సినిమాలో చూడ్డం మాత్రం అభిమానులకు మాంచి కిక్ ఇస్తుందనడంలో సందేహం లేదు.
