మాజీ కేంద్రమంత్రి, కాంగ్రెస్ పార్టీ ఫైర్ బ్రాండ్ నేత రేణుకా చౌదరిపై వైసీపీ నేత, మాజీ మంత్రి కొడాలి నాని ఇటీవల చేసిన వ్యాఖ్యలు సంచలనం రేపిన సంగతి తెలిసిందే. ఖమ్మంలో కార్పొరేటర్ గా కూడా గెలవని రేణుకా చౌదరి….అమరావతి రైతులకు మద్దతుగా వచ్చారంటూ కొడాలి నాని అసెంబ్లీలో ఎద్దేవా చేయడం వైరల్ అయింది. ఈ క్రమంలోనే తాజాగా కొడాలి నాని వ్యాఖ్యలపై రేణుకా చౌదరి దీటుగా స్పందించారు.
ఈ సందర్భంగా కొడాలి నానిపై రేణుక చౌదరి ఓ రేంజ్ లో విమర్శలు గుప్పించారు. కొడాలి నాని లారీలు కడుక్కునే సమయంలోనే తాను కార్పొరేటర్ అని రేణుక చౌదరి సంచలన వ్యాఖ్యలు చేశారు. బుజ్జి నీకు చరిత్ర తెలియదు…రాజీవ్ గాంధీ ఇచ్చిన ఫోన్టో గూగుల్ కొట్టు…రేణుకా చౌదరి అంటే ఏంటో నీకు తెలుస్తుంది అని నానిపై రేణుకా చౌదరి సెటైర్లు వేశారు. అసెంబ్లీలో తన ప్రస్తావన తెచ్చిన కొడాలి నానికి రేణుకా చౌదరి థ్యాంక్స్ కూడా చెప్పారు.
తన గురించి అసెంబ్లీలో మాట్లాడి తనకు బోలెడు ఫ్రీ పబ్లిసిటీ నాని తెచ్చారని, అంత పబ్లిసిటీ తెచ్చుకోవాలంటే చాలా డబ్బులు ఖర్చు పెట్టాలని చురకలాటించారు. నాని తనకు మంచి ఐడియా ఇచ్చారని, అందుకే రాబోయే ఎన్నికల్లో నాని సొంత నియోజకవర్గం గుడివాడ నుంచి తాను పోటీ చేస్తానని రేణుకా చౌదరి సంచలన వ్యాఖ్యలు చేశారు. తాను మున్సిపల్ కార్పొరేటర్ గా, ఎంపీగా, కేంద్ర మంత్రిగా పనిచేశానని, కానీ ఎమ్మెల్యేగా ఒక్కసారి కూడా పోటీ చేయలేదని అన్నారు.
గుడివాడలో పోటీ చేస్తే తానే గెలుస్తానని కొడాలి నానిని, మళ్లీ ఎవరు ఎన్నుకోరని చెప్పారు. ఏ ప్రాంతం నుంచి పోటీ చేసినా కాంగ్రెస్ పార్టీ తరఫున పోటీ చేస్తానని చెప్పారీ ఫైర్ బ్రాండ్ నేత. మరి రేణుకా చౌదరి తాజా కామెంట్లపై కొడాలి నాని స్పందన ఏ విధంగా ఉంటుందన్నది ఆసక్తికరంగా మారింది.
