విశ్వ విఖ్యాత నట సార్వభౌమ నందమూరి తారక రామారావు నట వారసుడిగా జూనియర్ ఎన్టీఆర్ టాలీవుడ్ లోని స్టార్ హీరోలలో ఒకరిగా నీరాజనాలు అందుకుంటున్న సంగతి తెలిసిందే. ‘బాల రామాయణం’తో బాల నటుడిగా తెరంగేట్రం చేసిన తారక్…ఆ తర్వాత అంచెలంచెలుగా ఎదిగి తాతకు తగ్గ మనవడిగా తండ్రికి తగ్గ తనయుడిగా ప్రశంసలందుకుంటున్నాడు. ‘స్టూడెంట్ నెం.1’తో హిట్ బాట పట్టిన జూ.ఎన్టీఆర్ ఆ తర్వాత తిరుగులేని మనిషిగా ఎదిగి తాతలాగే కథానాయకుడిగా వెలిగిపోతున్నాడు.
ఓ వైపు వరుస సినిమాలతో బిజీగా ఉంటూ వెండితెర ప్రేక్షకులను అలరిస్తోన్న తారక్… ‘బిగ్ బాస్’ వంటి రియాలిటీ షోకు హోస్ట్ గా వ్యవహరించి బుల్లితెర ప్రేక్షకులనూ ఆకట్టుకుంటున్నాడు. ప్రస్తుతం ‘ఆర్ఆర్ఆర్’ వంటి భారీ పాన్ ఇండియా మల్టీ స్టారర్ లో నటిస్తోన్న తారక్…మరోవైపు జెమినీ టీవీలో త్వరలో ప్రసారం కాబోతోన్న ‘ఎవరు మీలో కోటీశ్వరులు’ అనే రియాలిటీ షోకు హోస్ట్ గా వ్యవహరిస్తున్నాడు. ఈ నేపథ్యంలోనే తాజాగా విడుదలైన ‘ఎవరు మీలో కోటీశ్వరులు’ ప్రోమోలో తారక్ అదరగొట్టాడు.
ఇప్పటికే బిగ్ బాస్ లో హోస్ట్ గా అదరగొట్టిన తారక్…తాజాగా ‘ఎవరు మీలో కోటీశ్వరులు’ ప్రోమోలోనూ తన నటనతో, హావభావాలతో కట్టిపడేశాడు. ‘కౌన్ బనేగా కరోడ్ పతి’కి బిగ్ బీ అమితాబ్ వన్నె తెచ్చినట్టుగా… ‘ఎవరు మీలో కోటీశ్వరులు’ సీజన్-1 కు హోస్ట్ గా తారక్ బెంచ్ మార్క్ సెట్ చేస్తాడనడంలో ఎటువంటి సందేహం లేదు. ప్రపంచవ్యాప్తంగా 120 దేశాల్లో విపరీతంగా పాపులర్ అయి..9 భారతీయ భాషల్లో అనువదించిన వరల్డ్స్ బిగ్గెస్ట్ రియాలిటీ షో తెలుగు వెర్షన్ కు తారక్ హోస్ట్ గా వ్యవహరిస్తున్నాడు.
”కథ మీది…కల మీది… ఆట నాది…కోటి మీది… రండి గెలుద్దాం…. ‘ఎవరు మీలో కోటీశ్వరులు” అంటూ తారక్ ఎంతోమంది సామాన్యుల కథలను వినడానికి కలలను నిజం చేయడానికి నేను రెడీగా ఉన్నానంటూ వారికి తారక్ ఆహ్వానం పంపించాడు. ఇక్కడి నుంచి మీరెంత పట్టుకెళతారో నేను చెప్పలేను…కానీ, లైఫ్ లో నేను గెలవగలుగుతాను అన్న కాన్ఫిడెన్స్ మాత్రం కచ్చితంగా పట్టుకెళతారంటూ తారక్ తన డైలాగ్ డెలివరీతో మెస్మరైజ్ చేశాడు. మాటల మాంత్రికుడు, టాలీవుడ్ ప్రముఖ దర్శకుడు త్రివిక్రమ్ శ్రీనివాస్ తన మార్క్ డైలాగులతో ఈ ప్రోమోకు దర్శకత్వం వహించారు.
‘కౌన్ బనేగా కరోడ్ పతి’ టీవీ షో ఇప్పటివరకు తెలుగులో ‘మీలో ఎవరు కోటీశ్వరుడు’ పేరుతో మాటీవీలో ప్రసారమైంది. ఇప్పటివరకు తెలుగులో నాలుగు సీజన్లు జరిగాయి. 2014 జూన్‌లో నాగార్జున హోస్ట్‌గా ఈ షో తొలి సీజన్, 2014 డిసెంబర్‌లో రెండో సీజన్, 2015 నవంబర్‌లో మూడో సీజన్ ప్రసారమైంది. 2017లో ప్రసారమైన నాలుగో సీజన్ కు మెగాస్టార్ చిరంజీవి హోస్ట్ గా వ్యవహరించారు. అయితే, తాజాగా ఈ కార్యక్రమానికి ‘ఎవరు మీలో కోటీశ్వరులు’ అని పేరు మార్చగా…ఈ షో తొలి సీజన్ కు తారక్ హోస్ట్ గా వ్యవహరిస్తున్నాడు. అయితే, జెమినీ టీవీలో ఈ షో ఏ తేదీ నుంచి ప్రసారం కానుందనేది తెలియాల్సి ఉంది.
