మోహన్ లాల్, జీతు జోసెఫ్ అనగానే సౌత్ ఇండియన్ ప్రేక్షకుల్లో ఒక రకమైన ఎగ్జైట్మెంట్ కలుగుతుంది. వీరి కలయికలో వచ్చిన ‘దృశ్యం’, ‘దృశ్యం-2’ చిత్రాలు ఎంత సెన్సేషన్ క్రియేట్ చేశాయో తెలిసిందే. ఏడేళ్ల కిందట మలయాళ సినీ పరిశ్రమలోని రికార్డులన్నీ బద్దలు కొట్టేయడమే కాదు.. తెలుగు, తమిళం, హిందీ, కన్నడ, చైనీస్, సింహళ భాషల్లో రీమేక్ అయి.
అన్ని చోట్లా ఘనవిజయం సాధించింది ‘దృశ్యం’. దీనికి కొనసాగింపుగా వచ్చిన ‘దృశ్యం-2’ కొన్ని నెలల కిందటే అమేజాన్ ప్రైమ్‌లో విడుదలై అద్భుతమైన స్పందన రాబట్టుకుంది. ఇప్పుడీ చిత్రం తెలుగులోనూ రీమేక్ అయింది. తమిళం, హిందీ, కన్నడ భాషల్లోనూ రీమేక్‌కు సన్నాహాలు జరుగుతున్నాయి. దృశ్యం-3 తీసే ఆలోచన కూడా ఉందని జీతు జోసెఫ్ సంకేతాలు ఇవ్వగా.. అంతకంటే ముందు మోహన్ లాల్‌తో ఆయన కొత్త సినిమాను అనౌన్స్ చేయడం విశేషం.
‘ట్వల్త్ మ్యాన్’ పేరుతో మోహన్ లాల్, జీతు కలయిలో కొత్త సినిమా తెరకెక్కనుంది. అన్‌వీలింగ్ షాడోస్ అని దీనికి క్యాప్షన్ కూడా పెట్టారు. హిల్ స్టేషన్‌లా కనిపిస్తున్న ప్రాంతంలో రాత్రి పూట ఒక ఇంట్లోకి ఓ వ్యక్తి వెళ్తున్నట్లుగా దీని ప్రి లుక్ డిజైన్ చేశారు. టైటిల్, ప్రి లుక్ చూస్తుంటే జీతు జోసెఫ్ మరోసారి తనకు మంచి పట్టున్న థ్రిల్లర్ జానర్లోనే సినిమా తీయబోతున్నట్లు అర్థమవుతోంది. పకడ్బందీగా స్క్రిప్టు రెడీ చేసుకుని చాలా తక్కువ వ్యవధిలో సినిమాలు లాగించేయడంలో జీతు సిద్ధహస్తుడు.
మోహన్ లాల్‌లో వరుసగా సినిమాలు నిర్మిస్తున్న ఆశీర్వాద్ సినిమాసే ఈ చిత్రాన్ని కూడా ప్రొడ్యూస్ చేస్తోంది. ‘దృశ్యం-2’ తర్వాత లాల్ ‘ఆరట్టు’ అనే మాస్ మూవీ చేస్తున్నాడు. దీంతో పాటు ‘బరోజ్’ అనే భారీ చిత్రాన్ని స్వీయ దర్శకత్వంలో రూపొందిస్తున్నాడు. ఆయన ప్రియదర్శన్ దర్శకత్వంలో చేసిన ‘మరక్కార్’ విడుదలకు సిద్ధంగా ఉంది.
