సామాజిక చైతన్యం కోసం నోరు విప్పటం నేరం అవుతుందా? ఒక దారుణ ఘటన జరిగినప్పుడు మౌనంగా ఉండే కన్నా.. నోరు విప్పి మాట్లాడటం.. అందునా సెలబ్రిటీలు మాట్లాడితే.. ఆ ఇష్యూకు వచ్చే ప్రాధాన్యత అమాంతం పెరిగిపోతుంది. అయితే.. ఇలాంటి సందర్భాల్లో రూల్ బుక్ లోని నిబంధనల్ని పక్కాగా ఫాలో కావాల్సి ఉంటుంది. ఈ విషయంలో ఏ చిన్న తేడా దొర్లినా మొదటికే మోసం ఖాయం. ఇప్పుడు అలాంటి ఇబ్బందినే 40 మంది సెలబ్రిటీలు ఎదుర్కోనున్నారా? అన్నదిప్పుడు ప్రశ్నగా మారింది.
హైదరాబాద్ మహానగర శివారులో దిశ అనే అమ్మాయిని అత్యంత దారుణంగా హత్యాచారానికి గురి చేయటం.. దీనికి బాధ్యులైన వారిని కఠినంగా శిక్షించాలంటూ పెద్ద ఎత్తున నిరసన.. ఆందోళనలు పెల్లుబుకటం తెలిసిందే. దాదాపు రెండేళ్ల క్రితం శంషాబాద్ శివారులోచోటు చేసుకున్న ఈ దారుణం దేశ వ్యాప్తంగా హాట్ టాపిక్ గా మారింది. అయితే.. ఈ ఎపిసోడ్ లో బాధితురాలి పేరును వెల్లడించారని పేర్కొంటూ దేశ రాజధాని ఢిల్లీలోని సబ్జిమండి పోలీస్ స్టేషన్ లో తాజాగా కేసు నమోదు చేశారు.
దీనికి సంబంధించి ఢిల్లీకి చెందిన గౌరవ్ గులాటీ అనే న్యాయవాది కంప్లైంట్ ఇచ్చారు. ఇతగాడు ఇచ్చిన ఫిర్యాదుతో పోలీసులు ఐపీసీ సెక్షన్ 228ఏ కింద కేసు నమోదు చేశారు. వారెంట్ ఇష్యూ చేశారు. అయితే.. కేసు కట్టిన తర్వాత కూడా విచారణ విషయంలో పోలీసులు వేగంగా స్పందించటం లేదంటూ సదరు లాయర్ కోర్టును మరోసారి ఆశ్రయించటంతో కోర్టు ఇచ్చిన తాజా ఆదేశాలతో దర్యాప్తును ముమ్మరం చేశారు.
దిశ ఎపిసోడ్ లో ఆమె ఫోటోను.. పేరును రివీల్ చేశారంటూ పలువురు బాలీవుడ్.. టాలీవుడ్ ప్రముఖులే కాదు క్రీడాకారులు ఇతరరంగాలకు చెందిన ప్రముఖులు ఉన్నారు. వీరంతా చేసిన తప్పేమంటే.. తమ సోషల్ మీడియా ఖాతాలో దిశ ఫోటోను షేర్ చేయటంతో తాజా కేసు చిక్కులో చిక్కుకున్నారని చెప్పాలి. ఇంతకీ ఈ సెలబ్రిటీలు ఎవరన్నది చూస్తే..
బాలీవుడ్ :సల్మాన్‌ఖాన్‌, అక్షయ్‌కుమార్‌, అజయ్‌దేవ్‌గన్‌, అభిషేక్‌ బచ్చన్‌, ఫర్హాన్‌ అక్తర్‌, అనుపమ్‌ఖేర్‌, అర్మాన్‌ మాలిక్‌, కరీంవీర్‌ వోహ్రా, పరిణీత చోప్రా, దియా మిర్జా, స్వర భాస్కర్‌, జరీన్‌ ఖాన్‌, యామి గౌతమ్‌, రిచా చద్దా, షబానా అజ్మీ, ఫిలిం మేకర్‌ అలంకిత శ్రీవాస్తవ, బాలీవుడ్ దర్శకుడు మధుర్‌ భండార్కర్‌, గాయని సోనా మహాపాత్రలు ఉన్నారు.
టాలీవుడ్: రవితేజ, అల్లు శిరీష్‌, సాయి ధరమ్‌తేజ్‌, రకుల్ ప్రీత్‌సింగ్‌, కాజల్‌ అగర్వాల్‌, హన్సిక మోత్వాని, ప్రియా మాలిక్‌, మెహ్రీన్‌ పిర్జాదా, నిధి అగర్వాల్‌, ఛార్మీ కౌర్‌, అశిక రంగనాథ్‌, కీర్తి సురేష్‌, దివ్యాంశ్‌ కౌశిక్‌. టాలివుడ్‌ దర్శకుడు సందీ్‌పరెడ్డిలు ఉన్నారు. మోడల్: లావణ్యతోపాటు క్రీడాకారులు: క్రికెటర్‌ హర్భజన్‌ సింగ్‌, శిఖర్‌ ధావన్‌, స్టార్‌ షెట్లర్‌ సైనా నెహ్వాల్‌ తదితరులున్నారు.
