దేశం గర్వించదగ్గ దర్శకుడు రాజమౌళి రూపొందించిన అద్భుత సినీ కళాఖండం ‘ఆర్ఆర్ఆర్’పై ప్రపంచవ్యాప్తంగా ప్రశంసలు కురుస్తోన్న సంగతి తెలిసిందే. విడుదలైన ప్రతి చోటా రికార్డు కలెక్షన్లతో దూసుకుపోతోన్న ఈ చిత్రం బాహుబలి రికార్డులను బద్దలు కొడుతోంది. తొలి రోజు కలెక్షన్లలో ‘బాహుబలి 2’తో పాటు నాన్ బాహుబలి రికార్డులూ బ‌ద్ద‌లయ్యేలా ఆంధ్రప్రదేశ్, తెలంగాణలో కలిపి రూ.70 కోట్లకు పైగా కొల్లగొట్టింది.
ఈ సినిమాలో జూనియ‌ర్ ఎన్టీఆర్, రామ్ చరణ్ ల నట విశ్వరూపాన్ని చూసిన సినీ విమర్శకులు, సినీ ప్రముఖులు పొగడ్తలతో ఆర్ త్రయాన్ని ముంచెత్తుతున్నారు. ఈ క్రమంలోనే తాజాగా ఈ చిత్రంపై ఐకాన్ స్టార్ అల్లు అర్జున్ స్పందించాడు. మనమంతా గర్వపడే రాజమౌళి విజన్ గొప్పగా ఉందని, తన అన్న మెగా పవర్ రామ్ చరణ్ తన కెరీర్ లోనే గుర్తుండిపోయే పెర్ఫార్మెన్స్ చేసినందుకు గర్వంగా ఉందని బన్నీ ట్వీట్ చేశాడు.
పవర్ హౌస్ లాంటి నా బావ తారక్ షో చూస్తే చాలా ముచ్చటేసిందని, అతడంటే తనకు ఎప్పుడూ గౌరవం, ఇష్టమేని కితాబిచ్చాడు. భారతీయ సినిమాను గర్వపడేలా చేసిన చిత్రయూనిట్ మొత్తానికి ధన్యవాదాలని, నిజంగా ఇది KilleRRR బన్నీ ట్వీట్ చేశాడు. ఇక టాలీవుడ్ లెక్కల మాస్టారు, విలక్షణ దర్శకుడు సుకుమార్ ఈ సినిమాపై ఒక్క ముక్కలో అదిరిపోయే కామెంట్ చేశారు. ‘రాజమౌళి సార్… మీకు, మాకు ఒకటే తేడా. ఇలాంటి సినిమా మీరు తీయగలరు. మేము చూడగలం అంతే’ అంటూ సుకుమార్ చేసిన ట్వీట్ వైరల్ అయింది.
రాజమౌళి పక్కనే తామున్నా ఆయనను అందుకోవడానికి పరుగెత్తాలని, తాము ఆకాశంలో ఉన్నా రాజమౌళిని చూడాలంటే తలెత్తాలని సుకుమార్ ప్రశంసలు కురిపించారు. ఇక, తమిళ స్టార్ డైరెక్టర్ శంకర్ కూడా ఈ సినిమాపై స్పందించారు. “మీ ఊహా శక్తి అతీతమైనది .. మీకు హ్యాట్సాఫ్ చెప్పకుండా ఉండలేం. ఎన్టీఆర్ – చరణ్ ఎమోషనల్ పెర్ఫార్మెన్స్ ఎప్పటికీ నిలిచిపోతుంది. ఈ సినిమాకి పనిచేసిన ప్రతి ఒక్కరికీ అభినందనలు ‘మహారాజ’ మౌళి’’ అంటూ రాజమౌళిని ఆకాశానికెత్తేశారు.
