దర్శక ధీరుడు రాజమౌళి ద‌ర్శ‌క‌త్వంలో తెరకెక్కిన బాహుబలి చిత్రం బాక్సాఫీస్ రికార్డుల‌ను బ‌ద్ద‌లు కొట్టిన సంగ‌తి తెలిసిందే. ప్ర‌పంచానికి తెలుగు సినిమా స్టామినాను చాటి చెప్పిన ఈ చిత్రం హీరో ప్రభాస్ కు అంత‌ర్జాతీయ గుర్తింపును తెచ్చిపెట్టింది. బాహుబలి తర్వాత ప్రభాస్ పాన్ ఇండియా హీరోగనే కాకుండా గ్లోబ‌ల్ స్టార్ గా ఎదిగాడు. ఇండియాలో బాహుబలి తర్వాత ప్రభాస్ గ్రాఫ్ అమాంతం పెరిగిపోయింది. ఈ స్టార్ హీరోతో సినిమాలు తీసేందుకు బాలీవుడ్ నిర్మాత‌లు క్యూ క‌ట్టారు.
పాన్ ఇండియా రేంజ్ లో సాహో, రాధే శ్యామ్ చిత్రాలు రిలీజ్ కాగా…ఆది పురుష్ వంటి ప్రతిష్టాత్మక చిత్రం కోసం ప్రభాస్ భారీ రెమ్యున్ రేషన్ తీసుకుంటున్నాడు. ఈ క్రమంలోనే అమ‌రేంద్ర బాహుబలి పాత్రకు ప్రాణం పోసిన ప్రభాస్ ను మరోసారి అదే పాత్రలో తెరపై చూడాలని బాహుబలి అభిమానులు ఎదురుచూస్తున్నారు. అయితే, బాహుబలి-3 ఆలోచనపై జక్కన్న ఎలాంటి క్లారిటీ ఇవ్వలేదు. ఆ తర్వాత ప్రభాస్ కూడా వేరే సినిమాలతో బిజీ అయిపోయాడు. దీంతో, అంతా బాహుబలి-3 లేదని ఫిక్సయ్యారు. కానీ, తాజాగా ఆర్ఆర్ఆర్ ప్రమోషన్స్ లో జక్కన్న ఆ చిత్రం మూడో పార్ట్‌ పై షాకింగ్ అప్డేట్ ఇచ్చాడు.
బాహుబలి చిత్రానికి కొనసాగింపుగా మరో చిత్రం రానుందా? అన్న ప్రశ్నకు రాజమౌళి ఆసక్తికర సమాధానమిచ్చాడు. ‘తప్పకుండా రావొచ్చని, బాహుబలి చుట్టూ జరిగే ఎన్నో సంఘటనలు ఈసారి మీకు చూపించనున్నాం. దీనికి సంబంధించిన పనులు జరుగుతున్నాయి. ఇందుకు మా నిర్మాత శోభు యార్లగడ్డ కూడా సుముఖంగా ఉన్నారు. అయితే దీనికి కాస్త సమయం పడుతుండొచ్చు. కానీ బాహుబలి రాజ్యం నుంచి కచ్చితంగా ఆసక్తికరమైన వార్త రానుంది’ అంటూ రాజమౌళి గుడ్ న్యూస్ చెప్పారు. తమ హీరోను ప్రపంచస్థాయికి తీసుకెళ్లిన బాహుబలికి సీక్వెల్ ఉందని జక్కన్న చెప్పడంతో ప్రభాస్ ఫ్యాన్స్‌ ఆనందానికి అవధుల్లేవు. దీంతో, ఈ వార్త సోషల్ మీడియాలో ట్రెండింగ్‌ లో ఉంది.
