2019లో టీవీ 9 మాజీ సీఈవో రవి ప్రకాష్ పేరు వార్తల్లో ప్రముఖంగా వినిపించిన సంగతి తెలిసిందే. రవి ప్రకాష్ పై టీవీ 9 చానెల్ కొత్త యాజమాన్యం ఫిర్యాదు చేయడంతో ఆయన జైలుకు కూడా వెళ్లి వచ్చారు. ఆ తర్వాత కొత్త యాజమాన్యానికి, రవి ప్రకాష్ కు మధ్య కొంతకాలం వివాదం నడిచింది. ఆ తర్వాత కరోనా నేపథ్యంలో ఈ వ్యవహారం సద్దుమణిగింది. అయితే, ఇపుడు తాజాగా రవి ప్రకాష్ పేరు మరోసారి వార్తల్లోకెక్కింది.
అల్లరి నరేష్ నటించిన నాంది చిత్రంలో రవి ప్రకాష్ పాత్రను ప్రముఖ కమెడియన్ ప్రియదర్శి పోషించారన్న పుకారు ఇపుడు ఫిల్మ్ నగర్ లో చక్కర్లు కొడుతోంది. అయితే, ఆ సినిమాలో దర్శి ఓ జర్నలిస్ట్ పాత్రలో నటించారని, అది రవిప్రకాష్ దేనని ఊహాగానాలు వినిపిస్తున్నాయి. ఫిబ్రవరి 19న నాంది చిత్రం విడుదల కానున్న నేపథ్యంలో ఈ వార్తకు ప్రాధాన్యం సంతరించుకుంది. ఇప్పటికే నాంది ట్రైలర్ కు మంచి టాక్ వచ్చిన సంగతి తెలిసిందే.
ఒక వేళ ప్రియదర్శి చేస్తున్న పాత్ర రవి ప్రకాష్ దే అయితే, కమెడియన్ గా పేరున్న దర్శి…ఆ పాత్రలో ఎలా ఒదిగిపోయాడన్నదానిపై ఆసక్తి ఏర్పడింది. మీడియా రంగంలో మంచి పేరు సంపాదించిన రవిప్రకాష్….ఆ తర్వాత మోస్ట్ కాంట్రవర్షియల్ వ్యక్తిగా వార్తల్లో నిలిచిన నేపథ్యంలో రవి ప్రకాష్ పాత్రను దర్శకుడు ఎలా చిత్రీకరించాన్నది ఆసక్తికరంగా మారింది. మరోవైపు, నాంది చిత్రంలో తనది చాలా ఇంట్రస్టింగ్ క్యారెక్టర్ అని, ఆ పాత్ర చేస్తున్నప్పుడు చాలా ఎంజాయ్ చేశానని దర్శి చెబుతున్నాడు. మరి, ఆ పాత్ర రవి ప్రకాష్ దేనా కాదా…అన్నది తెలియాలంటే మరో రెండు రోజులు వేచి చూడక తప్పదు.
