గత కొద్ది నెలలుగా వైసీపీలో ఎంపీ విజయసాయిరెడ్డి హవా తగ్గుతోందని టాక్ వస్తోన్న సంగతి తెలిసిందే. విశాఖ జిల్లా ఇన్ చార్జిగా ఉన్న సాయిరెడ్డిపై గతంలో భూ కబ్జా, ల్యాండ్ సెటిల్మెంట్లు, ఇండస్ట్రీల నుంచి మామూళ్లు వసూళ్లు చేశారన్న ఆరోపణలు రావడంతో జగన్ సీరియస్ అయినట్లు తెలుస్తోంది. అందుకే, సాయిరెడ్డిని దూరం పెట్టిన జగన్…సజ్జలకు కొద్ది నెలలుగా ప్రాధాన్యతను కల్పిస్తూ వస్తున్నారని తెలుస్తోంది.
ఇటీవల జరిగిన మంత్రివర్గ పునర్వ్యవస్థీకరణలోనూ సాయిరెడ్డి పాత్ర ఏమీలేదని, అంతా సజ్జలే సెట్ చేశారని ప్రచారం జరిగింది. పార్టీలోనూ సాయిరెడ్డిపై కొందరు నేతలు అసంతృప్తి వ్యక్తం చేయడంతో జగన్ తాజాగా సంచలన నిర్ణయం తీసుకున్నారు. ఆ ఆరోపణల నేపథ్యంలో సాయిరెడ్డికి జగన్ షాకిచ్చారు. విశాఖ జిల్లా పార్టీ బాధ్యతల నుంచి విజయసాయిని జగన్ తప్పించడం ఇపుడు హాట్ టాపిక్ గా మారింది. విజయసాయి చేపట్టిన బాధ్యతలను వైవీ సుబ్బారెడ్డికి జగన్ అప్పగించారు.
తాజాగా జిల్లా ఇన్ చార్జిలు, ప్రాంతీయ సమన్వయకర్తలను జగన్ నియమించిన సంగతి తెలిసిందే. ఈ క్రమంలోనే సుబ్బారెడ్డికి విశాఖపట్నం, అల్లూరి సీతారామరాజు, అనకాపల్లి జిల్లాల సమన్వయకర్త బాధ్యతలను జగన్ అప్పగించారు. మంత్రి పెద్దిరెడ్డి, ఎంపీ మిథున్ రెడ్డిలకు 62 నియోజకవర్గాల బాధ్యతలను అప్పగించారు. అటువంటిది విజయసాయికి ఒక్క జిల్లా బాధ్యతను కూడా అప్పగించలేదు. తాడేపల్లి కేంద్రంగా విజయసాయికి జగన్ వేరే బాధ్యతలను అప్పగించారు.
ఓ పక్క విజయసాయికి పార్టీలో ప్రాధాన్యాన్ని తగ్గిస్తున్న జగన్…అదే సమయంలో సజ్జల రామకృష్ణారెడ్డికి మరింత ప్రాధాన్యతను కల్పించడం విశేషం. పార్టీ సమన్వయకర్తలను, జిల్లా అధ్యక్షులను సమన్వయం చేసే కీలక బాధ్యతను సజ్జలకు జగన్ అప్పగించారు. అంటే, పార్టీలో జగన్ తర్వాత నెంబర్ 2 సజ్జలే అన్నవిషయం మరోసారి రుజువైంది. దీంతో, విజయసాయికి జగన్ షాకిచ్చినట్లయింది.
