మెగా స్టార్ చిరంజీవి, స్టార్ డైరెక్టర్ కొరటాల శివల కాంబినేషన్ లో రాబోతోన్న ‘ఆచార్య’ చిత్రంపై టాలీవుడ్ లో భారీ అంచనాలున్నాయి. సెకండ్ ఇన్నింగ్స్ మొదలెపెట్టిన చిరు వరుస హిట్లతో దూసుకుపోతుండగా, కొరటాల శివ తన మార్క్ సందేశాత్మక-కమర్షియల్ సినిమాలతో మంచి ఫామ్ లో ఉన్నాడు. దీంతో, వీరిద్దరి కాంబోలో రామ్ చరణ్ తేజ్ నిర్మిస్తోన్న ‘ఆచార్య’ కోసం మెగా ఫ్యాన్స్ ఎంతగానో ఎదురుచూస్తున్నారు.
మెగా ఫ్యాన్స్ పెట్టుకున్న అంచనాలకు ఏ మాత్రం తగ్గకుండా ఆ చిత్రం నుంచి వచ్చిన ప్రతి అప్డేట్ ట్రెండింగ్ లో ఉంది. ఆ చిత్రంలోని ఐటం సాంగ్ ‘శానా కష్టం’ యూట్యూబ్ లో దుమ్మురేపుతుండగా…లాహే లాహే పాట చార్ట్ బస్టర్ గా నిలిచింది. ఆరు పదుల వయసులోనూ అదిరిపోయే స్టెప్పులతో చిరు అలరించగా….మెగా ఫ్యాన్స్ జోష్ లో ఉన్నారు. ఇక, ఇటీవల విడుదలైన ఈ చిత్ర ట్రైలర్ మెగా ఫ్యాన్స్ కు మెగా ఫీస్ట్ పెడుతూ చిత్రం పై అంచనాలను మరో రేంజ్ కు తీసుకువెళ్లింది. ఈ నెల 29న ప్రపంచవ్యాప్తంగా విడుదలకు ఈ చిత్రం సిద్ధమవుతోంది.
ఈ సందర్భంగా ఈ చిత్రం ప్రీ రిలీజ్ ఈవెంట్ ను ఈ నెల 23న విజయవాడలో నిర్వహించబోతున్నారు. అనూహ్యంగా ఈ ప్రీ-రిలీజ్ ఈవెంట్ కు ఏపీ సీఎం జగన్ చీఫ్ గెస్ట్ గా హాజరవుతున్నారు. సీఎం హోదాలో ఒక సినీ ఈవెంట్ కు జగన్ హాజరు కావడం ఇదే తొలిసారి కావడం విశేషం. చిరు, జగన్ ల ఫెవికాల్ బాండింగ్ కు ఈ ప్రీ రిలీజ్ ఈవెంటే నిదర్శనమని సోషల్ మీడియాలో కామెంట్లు వస్తున్నాయి. ఇక, ఈ చిత్ర ప్రమోషన్స్ జోరు పెంచిన చిరు…తాజాగా తన ట్విట్టర్ అకౌంట్ నూ ఆచార్యగా మార్చేశారు. తాజాగా తన ట్విట్టర్ ఖాతా పేరును ‘ఆచార్య’గా చిరు మార్చుకున్నారు. అంతేకాదు, తన అభిమానులతోపాటు తెలుగు ప్రజలందరికీ హనుమాన్ జయంతి శుభాకాంక్షలు చెప్పారు చిరు.
దీంతోపాటు, చెర్రీకి సంబంధించి మనసుకు హత్తుకునే ఓ వీడియోను తన ఇన్ స్టాగ్రామ్ ఖాతాలో పోస్ట్ చేసి….ఆ లింక్ ను ట్వీట్ చేశారు. స్వతహాగా హనుమాన్ భక్తుడైన చిరంజీవి హనుమాన్ జయంతిని పురస్కరించుకుని అందరికీ శుభాకాంక్షలు చెప్పారు. కాటేజీలో మేకప్ వేసుకుంటూ రామ్ చరణ్ రెడీ అవుతుండగా.. హనుమ ప్రతిరూపమైన ఓ వానరం అక్కడకు వచ్చింది. మేకప్ వేసుకున్నంత సేపు అక్కడే తారాడింది. మేకప్ వేసుకోవడం పూర్తయిన తర్వాత చరణ్.. ఆ వానరానికి బిస్కెట్లను అందించాడు. ఆ వీడియోకు హనుమ శ్లోకమైన ‘శ్రీ ఆంజనేయం.. ప్రసన్నాంజనేయం’ను బ్యాగ్రాండ్ మ్యూజిక్ గా చిరంజీవి పెట్టారు.
