ప్రతి ఏటా సంక్రాంతి సందర్భంగా నారా, నందమూరి కుటుంబాలు నారావారిపల్లె వెళ్లి సంక్రాంతి సంబరాలు జరుపుకోవడం ఆనవాయితీ. ఆ ఆనవాయితీని కొనసాగిస్తూ ఈ ఏడాది కూడా టీడీపీ అధినేత నారా చంద్రబాబు నాయుడు, హిందూపురం ఎమ్మెల్యే, సినీ నటుడు బాలకృష్ణలు కుటుంబసమేతంగా నారావారిపల్లెలో పండుగ జరుపుకుంటున్న సంగతి తెలిసిందే. ఈ క్రమంలోనే నేడు తిరుపతి నాగాలమ్మకట్ట వద్ద ఏర్పాటుచేసిన కార్యక్రమంలో చంద్రబాబు, బాలకృష్ణ పాల్గొని సందడి చేశారు.
ఈ కార్యక్రమంలో చంద్రబాబు, బాలయ్యల మనవాళ్లు దేవాన్ష్, ఆర్యవీర్ లు పాల్గొని తాతలను ఓ ఆటాడించారు. ఈ కార్యక్రమంలో ఇద్దరు చిన్నారులు చేసిన అల్లరి తాలూకు వీడియో ఇప్పుడు సోషల్ మీడియాలో వైరల్ గా మారింది. చాలాకాలం తర్వాత చంద్రబాబు, బాలకృష్ణలకు ఆటవిడుపు దొరకడంతో మనవాళ్లు ఇద్దరితో కలిసి వారు సరదాగా ఆడుకున్నారు. ఈ సందర్భంగా మనవళ్ళిద్దరూ తాతయ్యల సహనానికి పరీక్ష పెట్టి వారిని ఉరుకులు పరుగులు పెట్టించారు.
ముఖ్యంగా బాలకృష్ణ రెండో కుమార్తె తేజస్విని కుమారుడు ఆర్యవీర్ అయితే చంద్రబాబు తాతయ్యను ఆటపట్టించాడు. తాతయ్య బాలకృష్ణను వదిలేసి చంద్రబాబు పక్కన ఆర్యవీర్ కూర్చున్న వైనం ఆకట్టుకుంది. పెంకి పిల్లాడిలాగా ఆర్యవీర్ చేస్తున్న చేష్టలను చంద్రబాబు కూడా ఎంజాయ్ చేశారు. ఇక, దేవాన్ష్ కు బాలయ్య తొడపాశం పెడుతూ సందడి చేశారు. చంద్రబాబు ఒళ్లో కాళ్లు పెట్టిన ఆర్యవీర్ కు చంద్రబాబు క్యూట్ పనిష్మెంట్ ఇచ్చారు. ఆర్యవీర్ రెండు కాళ్లను గట్టిగా పట్టుకొని ఇదే పనిష్మెంట్ అంటూ చిన్న పిల్లాడిలా చంద్రబాబు ఆడుకోవడం ఆ వీడియోలో కనిపిస్తుంది.
