కొన్ని రోజులుగా కోలీవుడ్‌ను ఒక ఇష్యూ ఊపేస్తోంది. సీనియర్ నటుడు మన్సూర్ అలీ ఖాన్… త్రిషను ఉద్దేశించి చేసిన వ్యాఖ్యలు అక్క పెను దుమారమే రేపాయి. లియో సినిమాలో త్రిషతో తనకు కాంబినేషన్ సీన్లు లేకపోవడంపై అసంతృప్తి వ్యక్తం చేస్తూ.. ఆమెతో ఒక రేప్ సీన్ అయినా ఉంటుందని ఆశించానని మన్సూర్ చేసిన వ్యాఖ్యలు తీవ్ర వివాదాస్పదం అయ్యాయి.
ఈ వ్యాఖ్యలను ఎవ్వరైనా ఖండించాల్సిందే. కోలీవుడ్లో కూడా పలువురు ప్రముఖులు ఈ కామెంట్స్‌ను తప్పుబట్టారు. టాలీవుడ్ నుంచి మెగాస్టార్ చిరంజీవి కూడా ఈ కామెంట్స్‌ను ఖండించారు. దీన్ని స్వాగతించాల్సింది పోయి.. తమిళ జనాలు వీటిని ట్రోల్ చేశారు. కొన్ని వేడుకల్లో చిరు సరదాగా మాట్లాడిన మాటలు, కొన్ని చేష్టలను తప్పుబడుతూ తమిళ నెటిజన్లు ఆయన్ని ట్రోల్ చేయడం విడ్డూరం. ఈ వ్యవహారం ఇలా నడుస్తుండగానే ఇంకో టాపిక్ హైలైట్ అయింది.
తమిళ సీనియర్ నటి విచిత్ర.. ఓ టాలీవుడ్ టాప్ హీరో మీద చేసిన ఆరోపణలు దుమారం రేపాయి. ఒక తెెలుగు సినిమా చిత్రీకరణ టైంలో ఒక సీనియర్ టాప్ హీరో తనతో అసభ్యంగా ప్రవర్తించిన తీరును బిగ్ బాస్ షోలో ఎండగట్టింది విచిత్ర. ఆ నటుడి పేరు చెప్పకపోయినా.. ఆ టైం టైన్, ఇతర విషయాలను బట్టి ఆ సినిమా ఏదో, ఆ నటుడు ఎవరో ఒక అంచనాకు వచ్చారు జనాలు. ఆల్రెడీ చిరును ట్రోల్ చేస్తున్న తమిళ నెటిజన్లు.. ఇప్పుడీ టాపిక్ మీదికి దృష్టి మళ్లించారు. సదరు నటుడిని టార్గెట్ చేస్తూ మొత్తం టాలీవుడ్‌నే తప్పుబడుతున్నారు.
ఈ విషయంలో టాలీవుడ్ జనాలు కూడా రెండుగా విడిపోయారు. ఇంకోవైపు ఈ వ్యవహారం రాజకీయంగా కూడా కాక రేపుతోంది. ఆ నటుడు ఒక ప్రధాన పార్టీకి చెందిన కీలక నేత, ప్రజా ప్రతినిధి కావడంతో అవతలి పార్టీ ఆయన్ని టార్గెట్ చేస్తోంది. ఓవైపు ఆ నటుడిని వ్యతిరేకించే సినీ అభిమానులు, రాజకీయ ప్రత్యర్థులు ఈ ఇష్యూను బాగా హైలైట్ చేస్తూ.. విపరీతంగా ట్రోల్ చేస్తున్నారు. మొత్తంగా ఈ వ్యవహారం సినీ రంగంలోనే కాక రాజకీయ రంగంలోనూ కాక రేపుతోంది.
