నందమూరి నటసింహం బాలకృష్ణ, మాస్ డైరెక్టర్ బోయపాటి శ్రీనివాస్ ల కాంబినేషన్ లో వచ్చిన సింహా, లెజెండ్ చిత్రాలు బ్లాక్ బస్టర్ హిట్ లుగా నిలిచిన సంగతి తెలిసిందే. ఇక, బాలకృష్ణ .. బోయపాటి కాంబినేషన్లో తాజాగా విడుదలైన ‘అఖండ’ చిత్రం బంపర్ హిట్ గా నిలిచి టాలీవుడ్ కు కొత్త ఊపిరి పోసింది. ఇరు తెలుగు రాష్ట్రాలతోపాటు ఓవర్సీస్ లోనూ బాలయ్య కెరీర్ లో హయ్యెస్ట్ గ్రాసర్ గా ఈ చిత్రం నిలిచింది. దీంతో, అఖండతో మంచి హిట్ కొట్టిన బోయపాటి…తాజాగా పవర్ స్టార్ పవన్ కల్యాణ్ తో ఓ సినిమా చేయబోతున్నట్లు తెలుస్తోంది.
పవన్ కళ్యాణ్ – బోయపాటిల కాంబోలో సినిమా కోసం పవన్ అభిమానులు చాలాకాలంగా వెయిట్ చేస్తున్నారు. అయితే, తాజాగా అఖండతో హిట్ కొట్టిన బోయపాటి….పవన్ తో ఓ సినిమా చేసేందుకు రెడీ అవుతున్నారని టాక్ వస్తోంది. ఐకాన్ స్టార్ అల్లు అర్జున్‌తో చేయబోయే సినిమా కంటే ముందే పవన్ సినిమాను బోయపాటి పట్టాలెక్కించబోతున్నాడని సోషల్ మీడియాలో ప్రచారం జరుగుతోంది. అయితే, పవన్ భీమ్లా నాయక్ తో పాటు పలు వరుస ప్రాజెక్టులతో బిజీగా ఉన్నాడు.
మరోవైపు రాజకీయాలలోనూ పవన్ షెడ్యూల్ బిజీగా ఉంది. దీంతో, పవన్ ఒప్పుకున్న సినిమాలన్నీ పూర్తి కావాలంటే మరో ఏడాది పడుతుంది. ఆ తర్వాత 2024 ఎన్నికల పనుల్లో పవన్ బిజీగా ఉండే అవకాశముంది. ఈ లోపే బోయపాటితో సినిమాకు టైం సరిపోతుందా లేదా అన్నది తేలాల్సి ఉంది. ఏది ఏమైనా…అన్నీ కుదిరి సినిమా పట్టాలెక్కితే మాత్రం…పవన్ పవర్, బోయపాటి మాస్ డైరెక్షన్ ల కాంబో అభిమానులకు కనువిందు చేస్తుందనడంలో ఎటువంటి సందేహం లేదు.
