గత కొద్ది రోజులుగా సినీ ప్రముఖులను కోవిడ్19 వైరస్ వెంటాడుతోంది. తాజాగా ఆ జాబితాలో పూజా హెగ్డే చేరింది. తనకు కరోనావైరస్ పాజిటివ్ అని ట్విట్టర్ ద్వారా వెల్లడించింది. నాకు నేనుగా క్వారంటైన్ అయ్యాను. కోవిడ్19, ప్రభుత్వ ప్రొటోకాల్స్‌ను పాటిస్తూ జాగ్రత్తలు తీసుకొంటున్నాను అని చెప్పింది. ఇంట్లోనే క్వారంటైన్‌లో ఉంటున్నాన‌ని వెల్లడించింది. అలాగే త‌న‌ను క‌లిసిన‌వారంద‌రూ క‌రోనా ప‌రీక్ష‌లు చేయించుకోవాలని సూచించింది.
అలాగే నేను ట్రీట్‌మెంట్‌కు స్పందిస్తున్నాను. త్వరగా కోలుకొంటాననే భరోసా నాలో కనిపించింది. ఈ సమయంలో నాకు అండగా నిలిచిన ప్రతీ ఒక్కరుకి ధన్యవాదాలు. దయచేసి మీరు ఇంటి వద్దనే ఉండండి.. క్షేమంగా ఉంటూ తగిన జాగ్రత్తలు తీసుకొండి అంటూ కామెంట్ చేశారు. ఎల్ల‌ప్పుడూ త‌న వెంటే ఉంటూ ప్రేమాభిమానాలు కురిపిస్తున్న ప్ర‌తి ఒక్క‌రికీ ధన్యవాదాలు తెలిపింది.
ఇక రీసెంట్ గానే ఇన్‌స్టాగ్రామ్‌లో త‌న‌ను ఫాలో చేస్తున్న‌వారి సంఖ్య కోటీ 30 ల‌క్ష‌లు దాట‌డంతో ఫ్యాన్స్‌కు ఆనందంగా చెప్పింది పూజా. అంద‌రకీ హ‌గ్గులు, ముద్దులు అంటూ పోస్ట్ పెట్టింది. కానీ అంత‌లోనే కోవిడ్ సోకిందంటూ బాధాక‌ర‌మైన వార్త‌ను షేర్ చేసింది.
ప్రస్తుతం పూజా హెగ్డే ప్ర‌భాస్ రాధేశ్యామ్‌, అఖిల్ మోస్ట్ ఎలిజిబుల్ బ్యాచ్‌ల‌ర్‌, చిరంజీవి ఆచార్య చిత్రాల్లో న‌టిస్తోంది. అలాగే త‌మిళ స్టార్ విజయ్ 65వ సినిమాలోనూ హీరోయిన్‌గా ఎంపికైంది. ఇక హిందీలో ర‌ణ్‌వీర్ సింగ్ ద్విపాత్రాభిన‌యం చేస్తున్న స‌ర్క‌స్‌లోనూ కనపడనుంది.
