నందమూరి నటసింహం, మాస్ కా బాప్ నందమూరి బాలకృష్ణ ‘అఖండ’ చిత్రం తర్వాత వరుస సినిమాలను పట్టాలెక్కించిన సంగతి తెలిసిందే. ‘అఖండ’తో ఇండస్ట్రీకి ఊపిరి పోసిన బాలయ్య…యువ స్టార్ హీరోలకు దీటుగా యంగ్ డైరెక్టర్లకు అవకాశాలిచ్చారు. ఈ క్రమంలోనే అఖండ రేంజ్ లో ఉండేలా గోపీచంద్ మలినేని దర్శకత్వంలో బాలయ్య నటించిన ‘‘వీర సింహారెడ్డి’’ చిత్రంపై భారీ అంచనాలున్నాయి. ఆ అంచనాలకు తగ్గట్టుగానే ఈ చిత్రం నుంచి గతంలో విడుదలైన ఫస్ట్ సింగల్ ‘జై బాలయ్య’ పాట కొద్ది రోజుల నుంచి యూట్యూబ్ లో దుమ్ము రేపుతోంది.
రామజోగయ్య శాస్త్రి రచించిన ఈ మాస్ ఆంథెమ్ లో థమన్ కూడా బాలయ్యతో కలిసి చిందేయడంతో పాట వైరల్ అయింది. ‘రాజసం నీ ఇంటి పేరు… పౌరుషం నీ ఒంటి పేరు…జై బాలయ్య..జై జై బాలయ్యా’ అని సాగే ఈ పాట బాలయ్య అభిమానులకు పూనకాలు తెప్పించింది. ఈ క్రమంలోనే తాజాగా ఈ చిత్రం నుంచి మరో మాస్ నంబర్ ను చిత్ర యూనిట్ విడుదల చేసింది. ‘సుగుణ సుందరి .. సుర సుర సూపుల రాకుమారి’ అంటూ హీరోయిన్ శృతి హాసన్ తో కలిసి బాలయ్య ఊర మాస్ స్టెప్పులేశారు.
‘సీమా కుట్టిందే .. సిట్టి సీమా కుట్టిందే … దిల్లు కందిపోయేలాగా దిట్టంగా కుట్టిందే’ అంటూ శ్రుతి హాసన్ తో కలిసి బాలయ్య నానా రచ్చ చేశారు. తమన్ అందించిన సంగీతం, రామజోగయ్య శాస్త్రి సాహిత్యం…మాస్ ను విపరీతంగా ఆకట్టుకుంటున్నాయి. ఈ మధ్య కాలంలో మంచి సింగర్ గా గుర్తింపు తెచ్చుకొని చార్ట్ బస్టర్ పాటలు పాడిన రామ్ మిర్యాల, ఫిమేల్ సింగర్ స్నిగ్ధ శర్మలు ఈ పాటను పాడారు. శేఖర్ మాస్టర్ కొరియోగ్రఫీ ఈ పాటకే హైలైట్.
