హిందూపురంలో ఎమ్మెల్యే బాలకృష్ణ పర్యటించి అక్కడి ప్రజలతో భేటీ అయ్యారు. రంజాన్ సందర్భంగా ముస్లిం సోదరులతో సమావేశమైన బాలయ్య వారి సమస్యలను అడిగి తెలుసుకున్నారు. పవిత్ర రంజాన్ మాసం సందర్భంగా ఉపవాస దీక్షలు ఆచరిస్తున్న ముస్లిం సోదరులకు బాలయ్య బాబు ఇఫ్తార్ విందు ఏర్పాటు చేశారు. హిందూపురంలోని అలీ హిలాలా స్కూల్ గ్రౌండ్ లో భారీ స్థాయిలో ఇఫ్తార్ విందును టిడిపి నేతలు బాలయ్య ఆధ్వర్యంలో ఏర్పాటు చేశారు.
ఇక, ఈ ఇఫ్తార్ విందులో పాల్గొనేందుకు నియోజకవర్గంలోని ముస్లిం సోదరులు భారీ సంఖ్యలో హాజరయ్యారు. ముస్లిం సోదరులతో కలిసి ప్రత్యేక ప్రార్థనలు నిర్వహించిన బాలయ్య బాబు అనంతరం ఏర్పాటు చేసిన ఇఫ్తార్ విందులో స్వయంగా పాల్గొన్నారు. ముస్లిం సోదరులకు బాలయ్య స్వయంగా భోజనం వడ్డించడం విశేషం. అంతేకాదు, పలనాటి బ్రహ్మనాయుడు సహపంక్తి భోజన ధర్మాన్ని పాటించిన బాలయ్య…ముస్లిం సోదరులతో బంతిలో కూర్చొని భోజనం చేశారు.
ముస్లిం మత పెద్దలు ధరించే షాయాను ధరించి టోపీ పెట్టుకుని ముస్లిం వేషధారణలో కనిపించిన బాలయ్య ఫోటోలు ఇప్పుడు సోషల్ మీడియాలో వైరల్ గా మారాయి. ముస్లిం మతపెద్దలను సన్మానించిన బాలయ్య బాబు….ముస్లిం సోదరులందరికీ రంజాన్ మాస శుభాకాంక్షలు తెలిపారు. ముస్లిం సోదరులంతా ఎంతో నిష్టగా నియమ నిబంధనలు పాటిస్తూ ఉపవాస దీక్షలను ఆచరిస్తుంటారని బాలయ్య కొనియాడారు.
