అఖండ, వీర సింహారెడ్డి, భగవంత్‌ కేసరి చిత్రాలతో చాలా కాలం తర్వాత హ్యాట్రిక్ విజయాలు అందుకున్న నటసింహం నందమూరి బాలకృష్ణ.. ప్రస్తుతం ప్రముఖ దర్శకుడు బాబీ కొల్లి తో ఓ సినిమా చేస్తున్న సంగతి తెలిసిందే. `ఎన్‌బీకే 109` వర్కింగ్ టైటిల్ తో షూటింగ్ జరుపుకుంటున్న ఈ చిత్రం సంక్రాంతి కానుకగా ప్రేక్షకుల ముందుకు రాబోతోంది. అయితే నేడు ఈ సినిమా టైటిల్ టీజర్ ను నిర్మాతలు విడుదల చేశారు. బాలకృష్ణ, బాబీ కాంబో మూవీకి `డాకు మహారాజ్` అనే ఇంట్రెస్టింగ్ టైటిల్ ఖరారైంది.
టీజర్ విషయానికి వస్తే.. టైటిల్ కు తగ్గట్లుగానే విజువల్స్, బ్యాక్ గ్రౌండ్ స్కోర్, యాక్షన్ సీక్వెన్స్‌, బాలయ్య లుక్ మ‌రియు ఆయ‌న డైలాగ్ డెలివ‌రీ అదిరిపోయాయని చెప్పొచ్చు. డాకు మహారాజ్ గా థియేట‌ర్స్ లో బాలయ్య మాస్ జాతర సృష్టించడం ఖాయమని టీజర్ తో తేలిపోయింది.
2025 సంక్రాంతి కానుకగా జనవరి 12న డాకు మహారాజ్ విడుదల కానుందని చిత్ర బృందం అధికారికంగా తెలియజేసింది. కాగా, సితార ఎంటర్‌టైన్‌మెంట్స్‌, ఫార్చ్యూన్‌ఫోర్ సినిమాస్ బ్యాన‌ర్ల‌పై సూర్యదేవర నాగవంశీ, సాయి సౌజన్య నిర్మిస్తున్న ఈ చిత్రానికి ఎస్. థమన్ సంగీతం అందిస్తున్నారు. జెర్సీ ఫేమ్ శ్రద్ధా శ్రీనాథ్ ఇందులో హీరోయిన్ గా అల‌రించ‌బోతుంద‌ని అంటున్నారు.
