నందమూరి నటసింహం బాలకృష్ణ హోస్ట్ గా వ్యవహరిస్తున్న అన్ స్టాపబుల్ విత్ ఎన్బీకే సీజన్ టు దిగ్విజయంగా కొనసాగుతున్న సంగతి తెలిసిందే. ఈ సీజన్ లో ఇప్పటికే స్ట్రీమ్ అయిన అన్ని ఎపిసోడ్ లకు అదిరిపోయే రెస్పాన్స్ వచ్చింది. ఈ క్రమంలోనే ఈ సీజన్ లోని ఓ ఎపిసోడ్ కు టాలీవుడ్ పవర్ స్టార్, జనసేన అధినేత పవన్ కల్యాణ్ రాబోతుండడంతో నందమూరి, పవన్ ఫ్యాన్స్ ఆ ఎపిసోడ్ కోసం ఆతృతగా ఎదురుచూస్తున్నారు.
ఇప్పటికే, ఈ షోకు సంబంధించి విడుదలైన ప్రోమో దుమ్మురేపుతోంది. పవన్ కళ్యాణ్ స్టైలిష్ గా కనిపించడంతో బాలకృష్ణ సరదాగా కామెంట్ చేశారు. పవన్ వెళ్ళిపోయే లోపు ఆయన కొలతలు తీసుకోవాలంటూ పవన్ ను ఉద్దేశించి సరదాగా కామెంట్ చేశారు. ఈ క్రమంలోనే తాజాగా ఈ షోకు సంబంధించిన టీజర్ వీడియోను ఆహా టీం తాజాగా విడుదల చేసింది. పవన్ ను బాలయ్య పదునైన ప్రశ్నలతో ఇరకాటంలో పడేసే ప్రయత్నం చేశారు.
అన్నయ్య చిరంజీవి నుంచి నేర్చుకున్నవి ఏంటి, వద్దనుకున్నవి ఏంటి? అంటూ పవన్ ను బాలయ్య ప్రశ్నించడం ఈ షోకే హైలైట్. రాష్ట్రంలో దాదాపు ప్రతి ఒక్కరూ పవన్ ఫ్యానే అయినా ఆ అభిమానం ఓట్ల రూపంలోకి ఎందుకు మారడంలేదని బాలయ్య అడిగిన ప్రశ్నకు పవన్ సైలెంట్ అయ్యారు. ఈ మధ్య వాడీవేడీగా పదునైన విమర్శలు చేస్తున్నారంటూ..పవన్ చెప్పు చూపించిన వ్యవహారం గురించి పవన్ ను బాలయ్య అడిగినట్లుగా కనిపిస్తోంది.
నేను చాలా పద్ధతిగా మాట్లాడతానంటూ పవన్ చెప్పిన సమాధానానికి అంతా నవ్వుకున్నారు. మేం బ్యాడ్ బాయ్స్ 1-10 అంటూ బాలయ్య చెప్పడంతో అక్కడ నవ్వులుపూశాయి. ఇక, టీజర్ లోనే వేడి పుట్టించేలా ఉన్న ఈ ప్రశ్నలు..ఎపిసోడ్ లో మరింత పదునుగా ఉంటాయని తెలుస్తోంది. దీంతో, ఈ ఎపిసోడ్ ఎప్పుడు స్ట్రీమ్ అవుతుందా అని పవన్, బాలయ్య, మెగా అభిమానులు ఎదురుచూస్తున్నారు. ఇక, ఈ ఎపిసోడ్ ఎప్పుడు స్ట్రీమ్ అయినా సరే…రికార్డు వ్యూస్ రావడం ఖాయమని ఫ్యాన్స్ ధీమాగా ఉన్నారు.
