టాలీవుడ్ యంగ్ హీరో అడివి శేష్, యువ దర్శకుడు శైలేష్ కొలనుల కాంబినేషన్లో వచ్చిన ‘హిట్-2’ చిత్రం మంచి విజయం దిశగా దూసుకుపోతున్న సంగతి తెలిసిందే. సినిమా పేరుకు తగ్గట్టుగానే హిట్ టాక్ రావడంతో బాక్సాఫీస్ దగ్గర ఈ చిత్రం మంచి వసూళ్లు రాబడుతోంది. హిట్ సిరీస్ లో వచ్చిన రెండో కేసుకు ప్రేక్షకులు బాగానే కనెక్ట్ అయ్యారు. ఈ చిత్రంలో అడివి శేష్ అద్భుతంగా నటించాడని ఇప్పటికే సూపర్ స్టార్ మహేష్ బాబు తో పాటు పలువురు సినీ ప్రముఖులు ప్రశంసించారు.
ఈ నేపథ్యంలోనే తాజాగా ఈ సినిమాను నందమూరి నటసింహం బాలకృష్ణ వీక్షించారు. తన తనయుడు నందమూరి మోక్షజ్ఞతో కలిసి బాలయ్య బాబు హిట్-2 సినిమా చూడడం విశేషం. ఈ చిత్రం చూసిన తర్వాత అడివి శేష్, ఈ చిత్ర నిర్మాత నాని, దర్శకుడు శైలేష్ లను బాలయ్య అభినందించారు. ఈ చిత్రం చూసిన తర్వాత మోక్షజ్ఞతో పాటు బాలకృష్ణ, నాని, శైలేష్, అడివి శేష్ లు దిగిన ఫోటోలు ఇప్పుడు సోషల్ మీడియాలో వైరల్ గా మారాయి.
ఈ సందర్భంగా బాలకృష్ణకు అడివి శేష్ కృతజ్ఞతలు తెలుపుతూ ట్వీట్ చేశారు. బాలకృష్ణ సర్ కు ఈ సినిమా బాగా నచ్చిందని, శైలేష్ టేకింగ్ ను, తన నటనను బాలయ్య బాబు మెచ్చుకున్నారని అడవి శేష్ చెప్పాడు. ఇక హిట్ సిరీస్ లో రాబోయే తర్వాతి సినిమాలలో గెస్ట్ రోల్ చేయాలని బాలయ్యను అడిగానని, దానికి ఆయన సరదాగా నవ్వుతూ సైలెంట్ గా ఉన్నారని అన్నాడు. ఏమో ఏమైనా జరగొచ్చు…అంటూ సరదాగా ఒక ఎమోజీ పెట్టాడు.
