టాలీవుడ్ లో మాస్ డైరెక్టర్ గా బోయపాటి శ్రీనుకు మంచి ఇమేజ్ ఉంది. మాస్ పల్స్ ను పట్టడంలో….హీరోయిజాన్ని ప్రజెంట్ చేయడంలో బోయపాటి మార్క్ కనిపిస్తుంటుంది. ఇక, నందమూరి నటసింహం బాలకృష్ణకు ఉన్న మాస్ ఫాలోయింగ్ గురించి ప్రత్యేకంగా చెప్పనక్కరలేదు. ఈ ఇద్దరు మాస్ మేస్ట్రోల కాంబోలో వచ్చిన `సింహా`, `లెజెండ్` సినిమాలు బాక్సాఫీస్ రికార్డులు బద్దలుకొట్టిన సంగతి తెలిసిందే.
దీంతో, వీరిద్దరి కాంబోలో తెరకెక్కుతున్న తాజా చిత్రంపై భారీ అంచనాలు ఏర్పడ్డాయి. బోయపాటి డైరెక్షన్ లో బాలయ్య మరో పవర్‌ఫుల్ పాత్రలో బీబీ3లో కనిపించనున్నారు. ఈ సినిమాకు సంబంధించి ఇప్పటివరకు రకరకాల టైటిల్స్ సోషల్ మీడియాలో చక్కర్లు కొడుతున్నాయి. ఈ చిత్రానికి గాడ్ ఫాదర్ అనే టైటిల్ కూడా ఫిక్సయిందని కొంతకాలంగా ప్రచారం జరుగుతోంది. అయితే, ఉగాది పర్వదినాన ఆ ఊహాగానాలను పటాపంచలు చేస్తూ బీబీ3 టైటిల్ ను అధికారికంగా ప్రకటించారు.
ప్రేక్షకులు, బాలయ్య అభిమానుల అంచనాలకు తగ్గట్టుగానే ఈ చిత్ర టైటిల్‌ను ‘అఖండ’ అని చిత్ర యూనిట్ ఖరారు చేసింది. ఉగాది సందర్భంగా బాలయ్య ఫ్యాన్స్ కు బోయపాటి డబుల్ ధమాకా ఇచ్చారు. చిత్ర టైటిల్ తో పాటు…ఈ సినిమాలో బాలయ్య రెండో లుక్ తో కూడిన టీజర్ ను విడుదల చేశారు.
గతంలో విడుదలైన టీజర్ లో బాలకృష్ణ ఓ లుక్ విడుదల చేసిన చిత్రయూనిట్‌.. ‘అఖండ’ టీజర్‌లో బాలయ్య బాబు మరో లుక్‌ను విడుదల చేసింది. అఘోరా లుక్ లో ఉన్న బాలయ్య బాబు చెప్పిన పవర్‌ఫుల్ డైలాగ్ ఫ్యాన్స్ కు పూనకాలు తెప్పించింది. “కాలుదువ్వే నంది ముందు రంగు మార్చిన పంది.. కారు కూతలు కూస్తే కపాలం పగిలిపోద్ది” అంటూ చేతిలో త్రిశూలంతో బాలయ్య చెప్పిన డైలాగ్ కు థియేటర్లో విజిల్స్ మోతమోగడం ఖాయం.
పరమేశ్వరుడికి సంబంధించినో శ్లోకం బ్యాగ్రౌండ్‌లో వినిపిస్తుండగా…అఖండ టైటిల్ లోనూ శివలింగం కనిపించడం విశేషం. దీంతో, పరమశివుడిని పూజింజే పాత్రలో బాలయ్య కనిపించనున్నట్లు తెలుస్తోంది. ప్రస్తుతం అఖండ టీజర్ యూట్యూబ్ లో ట్రెండ్ అవుతోంది. మరోవైపు, ఈ చిత్రాన్ని విశ్వవిఖ్యాత నట సార్వభౌమ ఎన్టీయార్ జన్మదినోత్సవం సందర్భంగా మే 28న విడుదల చేసేందుకు ప్రయత్నిస్తున్నారు.
ఈ టీజర్ పై టీడీపీ జాతీయ ప్రధాన కార్యదర్శి, బాలకృష్ణ అల్లుడు నారా లోకేశ్ స్పందించారు. ‘అఖండ’ టీజర్ చూశాక ఎంతో థ్రిల్లయ్యానని, బాలా మావయ్య నట ఉగ్రరూపం చూపించాడని లోకేశ్ కితాబిచ్చారు ఈ సినిమా కచ్ఛితంగా తిరుగులేని బ్లాక్ బస్టర్ అవుతుందని లోకేశ్ అన్నారు.
