ప్ర‌తి ఏటా సంక్రాంతికి తెలుగు లోగిళ్ల‌లో గొబ్బెమ్మ‌ల‌తో పాటు…..టాలీవుడ్ లో సినిమాలు సంద‌డి చేయ‌డం ఆన‌వాయితీ. కొత్త సంవ‌త్స‌రంలో వ‌చ్చే తొలి తెలుగు పండుగ‌ను హిట్ తో ప్రారంభించాల‌నేది టాలీవుడ్ లో కొందరు హీరోలు, ద‌ర్శ‌క‌నిర్మాత‌ల సెంటిమెంట్. ఇక, సంక్రాంతి సెంటిమెంట్ ను నందమూరి నటసింహం బాలకృష్ణ బ‌లంగా న‌మ్ముతారు. గతంలో సంక్రాంతి సమయంలో గౌత‌మి పుత్ర శాత‌క‌ర్ణి, ఎన్టీఆర్ బయోపిక్ లతో బంప‌ర్ హిట్ కొట్టిన బాలయ్య మరోసారి వీర సింహారెడ్డి చిత్రంతో సంక్రాంతి బరిలో దిగబోతున్నాడు.
ఇక, చిరంజీవి కూడా సంక్రాంతి సందర్భంగా తన రీఎంట్రీ మూవీ ఖైదీ నెం.150తో సూపర్ హిట్ కొట్టి తన స్టామినా ఏ మాత్రం త‌గ్గ‌లేద‌ని ప్రూవ్ చేశాడు. ఈ క్రమంలోనే తాజాగా రాబోయే ఏడాది సంక్రాంతి సందర్భంగా మరో హిట్ కొట్టేందుకు చిరు రెడీ అయ్యాడు. చిరంజీవి, బాబీల కాంబోలో తెరకెక్కిన వాల్తేరు వీరయ్య చిత్రం కూడా సంక్రాంతికి విడుదల చేయబోతున్నట్లుగా చిత్ర యూనిట్ అధికారికంగా ప్రకటించింది.
జనవరి 12న వీర సింహారెడ్డి విడుదల కాబోతుండగా, ఒక్క రోజు తేడాతో జనవరి 13న సంక్రాంతి సందర్భంగా వాల్తేరు వీరయ్య కూడా సంక్రాంతి పోరులో దిగుతున్నాడు. చాలా రోజుల తర్వాత మెగాస్టార్ చిరంజీవి ఫుల్ లెన్త్ పక్కా మాస్ ఎంటర్ టైనర్లో నటించడంతో ఈ చిత్రంపై మెగా ఫ్యాన్స్ భారీ అంచనాలు పెట్టుకున్నారు. యువ దర్శకుడు బాబీ తెరకెక్కించిన ఈ చిత్రం కోసం చిరు అభిమానులంతా ఆతృతగా ఎదురుచూస్తున్నారు.
ఈ సినిమాలో చిరు సరసన శృతిహాసన్ నటించగా…రాజేంద్రప్రసాద్, బాబీ సింహా, వెన్నెల కిషోర్, కేథరిన్ లు కీలకపాత్రలో నటించారు. మరి, సంక్రాంతి బరిలో బాలయ్య చిరులు పందెం కోళ్ళ మాదిరిగా పోటీపడుతుంగా…ఈ పోరులో ఎవరు గెలుస్తారో అన్నది తేలాల్సి ఉంది.
