విశ్వవిఖ్యాత, నటసార్వభౌమ నందమూరి తారక రామారావు నటవారసుడిగా నటసింహం నందమూరి బాలకృష్ణ తన తండ్రి బాటలోనే ఇటు సినీరంగంలోనూ అటు రాజకీయ రంగంలోనూ రాణిస్తూ తండ్రికి తగ్గ తనయుడని ఖ్యాతి గడించారు. దాదాపు మూడు దశాబ్దాలుగా వెండితెరపై ఎన్నో వైవిద్యభరితమైన చిత్రాలతో ప్రేక్షకులను అలరిస్తున్న బాలయ్య …ఈ తరం హీరోలతోనూ పోటీపడి బ్లాక్ బస్టర్ హిట్ లతో బాక్సాఫీస్ ను షేక్ చేస్తున్నారు.
అయితే, బాలయ్య బాబు నట, రాజకీయ వారసుడైన నందమూరి మోక్షజ్ఞ తెరంగేట్రం ఎప్పుడెప్పుడా అని నందమూరి అభిమానులు ఆసక్తిగా ఎదురుచూస్తున్నారు. కానీ, మోక్షజ్ఞకు సినిమాలపై ఇంట్రెస్ట్ లేదని, అందుకే బాలయ్య నట వారసుడి తెరంగేట్రం లేట్ అవుతోందని ఊహాగానాలు వినిపించాయి. ఆ పుకార్లను కొట్టిపారేస్తూ తన తనయుడు మోక్షజ్ఞ తెరంగేట్రంపై నందమూరి బాలకృష్ణ కీలకమైన వ్యాఖ్యలు చేశారు.
వచ్చే ఏడాది మోక్షజ్ఞను హీరోగా పరిచయం చేయబోతున్నానని బాలకృష్ణ స్వయంగా వెల్లడించారు. అయితే, ఏ దర్శకుడు మోక్షజ్ఞను లాంచ్ చేయబోతున్నారన్న విషయం మాత్రం బాలయ్య వెల్లడించలేదు. తనకు మూడు బంపర్ హిట్స్ ఇచ్చిన బోయపాటి శ్రీను చేతిలో మోక్షజ్ఞను పెడతారా అన్న ప్రశ్నకు బాలయ్య అంతా దైవేచ్ఛ అంటూ సమాధానం దాటవేశారు. ఇక, అఖండకు సీక్వెల్ ఉంటుందని, సబ్జెక్టు కూడా రెడీ అయిందని ఫ్యాన్స్ కు బాలయ్య గుడ్ న్యూస్ చెప్పారు.
కాగా, గత ఏడాది మోక్షజ్ఞ తెరంగేట్రంపై బాలయ్య ఆసక్తికర వ్యాఖ్యలు చేసిన సంగతి తెలిసిందే. తన తనయుడి తొలిసినిమాకు తానే దర్శకత్వం వహించబోతున్నానని, ‘ఆదిత్య369’ సీక్వెల్ తో మోక్షజ్ఞను వెండితెరకు పరిచయం చేయబోతున్నానని బాలయ్య అన్నారు. ఆ సినిమాలో తాను కూడా నటించబోతున్నానని, ఆ సినిమాకు తానే కథ రాసి దర్శకత్వం వహిస్తానని చెప్పారు బాలయ్య.
