ఢిల్లీ లిక్కర్ స్కామ్ వ్యవహారంలో వైసిపి ఎంపీ విజయసాయిరెడ్డి అల్లుడు రోహిత్ రెడ్డి సోదరుడు శరత్ చంద్రా రెడ్డి పేరు వినిపిస్తున్న సంగతి తెలిసిందే. దీంతో విజయసాయి రెడ్డిపై టిడిపి నేతలు విమర్శలు గుప్పిస్తున్నారు. ఈ నేపథ్యంలోనే ఈ వ్యవహారంపై కొడాలి నాని స్పందించారు. ఈ స్కామ్ లో విజయసాయిరెడ్డి అల్లుడు లేరని కొడాలి నాని చెప్పుకొచ్చారు. అంతేకాదు, అరబిందో సంస్థతో చంద్రబాబుకు సంబంధం ఉందంటూ కొడాలి నాని షాకింగ్ ఆరోపణలు చేశారు.
దమ్ముంటే ఈ విషయంపై చంద్రబాబు ప్రమాణం చేయాలని కొడాలి నాని సవాల్ విసిరారు. 2004 నుంచి 2019 వరకు అరబిందో సంస్థ నుంచి చంద్రబాబు పార్టీ ఫండ్ వసూలు చేశారని సంచలన ఆరోపణలు చేశారు. 2024 ఎన్నికలే చంద్రబాబుకు చివరి ఎన్నికలని కొడాలి నాని చెప్పారు. చంద్రబాబు జీవితంలో పులివెందులలో ఒక పంచాయతీ కూడా గెలవలేరంటూ ఛాలెంజ్ చేశారు.
నారావారిపల్లెలో గెలవలేని చంద్రబాబు కుప్పంలో ఎలా గెలుస్తారంటూ కొడాలి నాని విమర్శలు గుప్పించారు. 2019 ఎన్నికల ఫలితాలతో చంద్రబాబు, లోకేష్, పవన్ కళ్యాణ్ లు రాజకీయ అనాధలయ్యారని విమర్శించారు. చంద్రబాబుకు జనసేనను పవన్ అంకితం చేశారని, 2024 ఎన్నికల తర్వాత పార్టీ జెండా పీక్కుని పవన్ వెళ్ళిపోతారని నాని విమర్శించారు. నాని వ్యాఖ్యలపై టీడీపీ నేతల స్పందన ఏ విధంగా ఉంటుందన్నది ఆసక్తికరంగా మారింది.
