కేవలం రూ.99కే మ‌ల్టీప్లెక్స్‌లో సినిమా చూసే అవ‌కాశం కల్పించింది మల్టీప్లెక్స్ అసోసియేషన్ ఆఫ్ ఇండియా. ఈ నెల 31న సినిమా లవర్స్ డే సందర్భంగా ఒక్కరోజు ఈ బంపర్‌ ఆఫర్‌ను ప్రకటించింది. దేశ‌వ్యాప్తంగా ఉన్న పీవీఆర్, ఐనాక్స్, సినీపోలీస్, సిటీప్రైడ్, ఏషియన్, మిరేజ్, మూవీ టైన్ వంటి మల్టీప్లెక్స్ థియేట‌ర్లలో రూ.99కే సినిమా చూడొచ్చు.
31వ తేదీన దేశంలోని మల్టీప్లెక్స్ థియేటర్స్‌లో ఏ భాష సినిమా అయినా, ఏ షో అయినా ప్రేక్షకులు రూ. 99కే చూడొచ్చు. నష్టాల కారణంగా ఇటీవల సింగిల్ స్క్రీన్ థియేటర్లు మూతపెట్టారు. ఈ నేపథ్యంలో సినీ ప్రియులను మల్టీప్లెక్స్ ల వైపు లాగేందుకు ఈ అఫర్ ప్రకటించారు.
అధిక ధరల కారణంగా సినీ ప్రియులు మల్టీప్లెక్స్ లలో సినిమా చూడలేకపోతున్నారు. పేటీఎం, అమెజాన్‌ పే, బుక్‌మైషో వంటి ఆన్‌లైన్‌ ప్లాట్‌ఫామ్స్‌లో ఈనెల 31 సినిమా టిక్కెట్లు బుక్‌ చేసుకునే వారు రూ.99తోపాటు జీఎస్టీ, కన్వీనియన్స్‌ ఫీజు అదనంగా చెల్లించాల్సి ఉంటుంది. థియేటర్‌ కౌంటర్‌ వద్ద టిక్కెట్‌ కొనుగోలు చేస్తే కేవలం రూ.99కే టిక్కెట్‌ లభిస్తుంది.
