ఇది ఓటీటీల కాలం…కరోనా పుణ్యమా అంటూ జనం థియేటర్ల కంటే ఓటీటీలకే ఎక్కువ ప్రాధాన్యతనిస్తున్న కలికాలం…అందుకే, అమెజాన్ ప్రైమ్, నెట్ ఫ్లిక్స్, జీ5 తో పాటు పలు దిగ్గజ ఓటీటీ ప్లాట్ ఫాంలన్నీ కొత్త కంటెంట్ కోసం విశ్వప్రయత్నాలు చేస్తున్నాయి. ఈ క్రమంలోనే తెలుగులో తొలి ఓటీటీ అయిన ఆహా కూడా….ఒరిజినల్ కంటెంట్ తోపాటు టాక్ షోలతో తన సత్తా చాటేందుకు ప్రయత్నిస్తోంది.
ఈ క్రమంలోనే నందమూరి నటసింహం బాలకృష్ణతో ఆహా…ఓ టాక్ షోను రూపొందించింది. బాలకృష్ణను తొలిసారిగా ఓటీటీ ఫ్లాట్ ఫామ్ లో పరిచయం చేస్తున్న ఆహా…అన్ స్టాపబుల్’ అనే టాక్ షోతో ప్రేక్షకుల ముందుకు రానుంది. నవంబర్ 4న దీపావళి కానుకగా ‘ఆహా’లో స్ట్రీమ్ కానున్న ఈ ప్రోగ్రామ్ కర్టన్ రైజర్ కార్యక్రమం ఈ రోజు ఘనంగా జరిగింది. నందమూరి బాలకృష్ణ తొలిసారి హోస్టు చేయబోతోన్న టాక్ షో ‘అన్స్టాపబుల్ విత్ ఎన్బికే’ షోను అల్లు అరవింద్ గ్రాండ్ గా లాంచ్ చేశారు.
ఈ సందర్భంగా బాలయ్యపై అల్లు అరవింద్ ఆసక్తికర వ్యాఖ్యలు చేశారు. బాలకృష్ణకు నిజజీవితంలో నటించడం రాదని, ఆయన తెరపైనే గొప్ప నటుడు అని అన్నారు. బయట ఆయన జీవిస్తూ ఉంటారని, ఆయనకు కోపం వస్తే కోపం, సంతోషం వస్తే సంతోషం.. ఏదొస్తే అది నటించకుండా చూపించే మనస్తత్వం అని కొనియాడారు. రియల్ ఎమోషన్స్ ను చూపించగల బాలయ్య ఈ టాక్ షో చేస్తే ఎలా ఉంటుందో ప్రేక్షకులు, నందమూరి అభిమానులు ఊహించుకోవచ్చని అన్నారు.
ఎదుటి వ్యక్తి నుంచి ఏం తీసుకోవచ్చు ? వాళ్ళతో ఏం చెప్పిస్తే షోను రక్తి కట్టించొచ్చు ? అనే విషయాలు బాలయ్యకు బాగా తెలుసని, బాలయ్య అనుభవం మొత్తం పెట్టి ఈ షో చేశారని అన్నారు..ఈ షో తో పాటు ‘అఖండ’ చిత్రం కూడా అఖండమైన సక్సెస్ కావాలని అల్లు అరవింద్ కోరుకున్నారు. ఇప్పటికే, చిరంజీవి, నాగార్జున, జూ.ఎన్టీఆర్, రానా, నానిలు హోస్ట్ లుగా సక్సెస్ ఫుల్ గా రాణించారు. ఇదే కోవలో బాలయ్య కూడా సక్సెస్ ఫుల్ హోస్ట్ గా షోను రక్తి కట్టిస్తారని కాన్ఫిడెంట్ గా ఉన్న నందమూరి అభిమానులు ఆతృతగా ఈ షో కోసం ఎదురు చూస్తున్నారు.
