టాలీవుడ్ యంగ్ రెబల్ స్టార్, ‘బాహుబలి’ ప్రభాస్ నటించిన తాజా చిత్రం ఆది పురుష్. బాలీవుడ్ దర్శకుడు ఓం రౌత్ దర్శకత్వంలో తెరకెక్కిన ఈ చిత్రంపై ప్రభాస్ అభిమానులు, రామాయణ ఇతివృత్తాన్ని అభిమానించేవారు బోలెడాశలు పెట్టుకున్నారు. అయితే, ఇటీవల విడుదలైన ఈ చిత్ర టీజర్ ఫ్యాన్స్ తో పాటు రామాయణం అభిమానులను తీవ్రంగా నిరాశ పరిచింది. ఈ చిత్రంలో హనుమంతుడు, రావణాసురుడి పాత్రలను తీర్చిదిద్దిన తీరుపై బీజేపీ నేతలు, హిందుత్వ సంస్థలు కూడా ఆగ్రహం వ్యక్తం చేస్తున్నాయి.
ఈ క్రమంలోనే దర్శకుడు ఓం రౌత్ పై ప్రభాస్ ఆగ్రహం కూడా వ్యక్తం చేసినట్టుగా పుకార్లు వస్తున్నాయి. దీంతో, ఈ చిత్ర యూనిట్ దిద్దుబాటు చర్యలు చేపట్టినట్టుగా కనిపిస్తోంది. ఈ క్రమంలోనే హైదరాబాద్ వేదికగా నేడు ఆదిపురుష్ చిత్ర 3డీ టీజర్ ను విడుదల చేసేందుకు దర్శకుడు ఓం రౌత్ సిద్ధమయ్యారు. ఈ కార్యక్రమానికి ప్రభాస్, దర్శకుడు ఓం రౌత్ కూడా హాజరుకాబోతున్నారు. ఇటీవల విడుదలై ట్రోలింగ్ కు గురైన టీజర్ గురించిన వివరణ కూడా ఇదే వేదికపై దర్శకుడు ఇవ్వబోతున్నారట.
రూ.500 కోట్ల భారీ బడ్జెట్ తో రూపొందిన ఈ చిత్రంలో రాముడిగా ప్రభాస్, సీతగా కృతి సనన్ నటిస్తున్నారు. ఇక, ఈ చిత్రంలో రావణుడిగా బాలీవుడ్ స్టార్ హీరో సైఫ్ అలీఖాన్ నటిస్తున్నారు. వచ్చే ఏడాది సంక్రాంతి సందర్భంగా జనవరి 12న ఈ చిత్రం ప్రపంచవ్యాప్తంగా విడుదలకు సిద్ధమవుతోంది. దీంతో, ఈ రోజు విడుదల కాబోతోన్న 3డీ టీజర్ పై సర్వత్రా ఉత్కంఠ ఏర్పడింది.
మరోవైపు, ఢిల్లీలోని రామ్ లీలా మైదానంలో జరిగిన రావణ సంహార కార్యక్రమానికి ప్రభాస్ హాజరయ్యారు. దసరా నాడు దేశ రాజధాని లోని రామ్ లీలా మైదానంలో ఈ కార్యక్రమాన్ని రామ్ లీలా కమిటీ నిర్వహిస్తుంది. గత రెండేళ్లుగా కరోనా నేపథ్యంలో ఈ వేడుకలు జరగకపోవడంతో ఈ ఏడాది అట్టహాసంగా నిర్వహించేందుకు రాంలీలా కమిటీ నిర్ణయించింది. ఈ క్రమంలోనే ఈ వేడుకకు ప్రభాస్ తో పాటు దర్శకుడు రౌత్ ను కూడా ఆహ్వానించింది. ఈ క్రమంలోనే విల్లు చేతబట్టిన ప్రభాస్…రావణుడి దిష్టిబొమ్మను బాణంతో దహనం చేశారు. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది.
Our Raghava, #Prabhas fired arrows to burn the Ravan Effigy in #RavanDahan, Delhi.#JaiShreeRam #Adipurush pic.twitter.com/FKx6Ldh0hO
— Prasad Bhimanadham (@Prasad_Darling) October 5, 2022
