ఏ మాత్రం అంచనాలు లేకుండా విడుదలైన ‘కేజీఎఫ్’ సినిమా…అఖండ విజయం సాధించిన సంగతి తెలిసిందే. దక్షిణాది సినిమాల్లో క్లాసిక్ బ్లాక్ బస్టర్ మూవీగా నిలిచిన ఈ కన్నడ చిత్రం…పాన్ ఇండియా మూవీగా రికార్డులు తిరగరాసింది. దీంతో, ‘కేజీఎఫ్ : చాప్టర్ 2’ కోసం యావత్ భారతదేశపు సినీ అభిమానులు ఎంతో ఆసక్తిగా ఎదురుచూస్తున్నారు. ఈ పాన్ ఇండియా మూవీలో అధీరాగా బాలీవుడ్ వెటరన్ హీరో సంజయ్ దత్ నటిస్తుండగా…మరో కీలక పాత్రలో రవీనా టాండన్ నటిస్తోంది.
దీంతో, ఈ చిత్రం కోసం బాలీవుడ్ ప్రేక్షకులు కూడా ఆతృతగా ఎదురుచూస్తున్నారు. ఇప్పటికే విడుదలైన ‘కేజీఎఫ్ : చాప్టర్ 2’ టీజర్ కొత్తి రికార్డులు క్రియేట్ చేసింది. ఈ సినిమాకు సంబంధించిన అప్డేట్స్ ను ఇస్తున్న చిత్ర యూనిట్…ప్రేక్షకుల అంచనాలను మరింత పెంచుతోంది. ఇందులో భాగంగానే నేడు సంజయ్ దత్ బర్త్ డే సందర్భంగా తాజాగా ‘కేజీఎఫ్ 2’లో అధీరా పూర్తి కొత్త లుక్ రిలీజ్ చేసింది చిత్ర యూనిట్. చేతిలో భారీ ఖడ్గం పట్టుకున్న అధీరా…రాఖీ భాయ్ తో తలపడి కేజీఎఫ్ ను దక్కించుకునేందుకు ఎదురు చూస్తున్నట్టుగా ఉంది.
ఎంతో పవర్‌ఫుల్‌గా కనిపిస్తున్న సంజూ లుక్ వైరల్ అయింది. కన్నడ రాకింగ్ స్టార్ యష్ – ప్రశాంత్ నీల్ కాంబినేషన్‌లో వస్తోన్న ఈ భారీ బడ్జెట్ మూవీని ఈ ఏడాది అక్టోబర్ లో ప్రేక్షకుల ముందుకు తీసుకువచ్చేందుకు సన్నాహాలు చేస్తున్నారు. త్వరలోనే ఈ సినిమా అఫీషియల్ రిలీజ్ డేట్ అనౌన్స్ చేస్తారని తెలుస్తోంది. ఆల్రెడీ ఈ అక్టోబర్ 13న ఆర్ఆర్ఆర్ చిత్రం రిలీజ్ డేట్ ఫిక్స్ అయిన సంగతి తెలిసిందే. మరి, ఆర్ఆర్ఆర్ తో పోటీ పడకుండా ఉండేందుకు కేజీఎఫ్-2 విడుదల తేదీ వాయిదా వేస్తారా…లేక అక్టోబర్ లోనే విడుదల చేస్తారా అన్నది ఆసక్తికరంగా మారింది.
