ఇటీవల కాలంలో రోడ్డు ప్రమాదాలు అంతకంతకూ పెరిగిపోతున్నాయి. నిర్లక్ష్యం.. మితిమీరిన ఆత్మవిశ్వాసం.. అమితమైన వేగం.. వెరసి రోడ్డు ప్రమాదాలతో ఎంతోమంది ప్రాణాలు కోల్పోతున్నారు. పోలీసులు ఎంతలా అవగాహన కల్పించినప్పటికీ పట్టనట్లుగా వ్యవహరిస్తున్న వైనం పలు దారుణాలకు అవకాశం ఇస్తోంది.
తాజాగా అలాంటి దారుణ ప్రమాదం ఒకటి చోటు చేసుకుంది. తమిళనాడులోని చెంగల్ పట్టు జిల్లా మామల్లపురంలో ఒక రోడ్డు ప్రమాదం ఇప్పుడు అందరిని ఆకర్షిస్తోంది. ఈ ప్రమాదంలో తీవ్ర గాయాలకు గురైన బిగ్ బాస్ నటి.. కోలీవుడ్ లో పలు చిత్రాల్ని చేసిన యషికా ఆనంద్ ఆరోగ్య పరిస్థితి విషమంగా ఉన్నట్లు చెబుతున్నారు.
ఇదే ప్రమాదంలో యాషికా ఆనంద్ స్నేహితురాలు.. హైదరాబాద్ సాఫ్ట్ వేర్ ఇంజనీర్ భవాని మరణించారు. కారులోని మరో ఇద్దరికి కూడా గాయాలైనట్లుగా తెలుస్తోంది. మద్యం సేవించి అమితమైన వేగంతో కారును నడిపిన వేళ.. కారు అదుపు తప్పినట్లుగా భావిస్తున్నారు. డివైడర్ ను బలంగా ఢీ కొట్టటంతో ప్రమాద తీవ్రత పెరిగిందని చెబుతున్నారు. యాక్సిడెంట్ జరిగిన వెంటనే.. యాషికను.. కారులోని మరో ఇద్దరిని చెన్నైలోని ఒక ప్రైవేటు ఆసుపత్రికి తరలించి చికిత్స చేస్తున్నారు.
ప్రస్తుతం యాషిక పరిస్థితి మాత్రం ఏ మాత్రం బాగోలేదని చెబుతున్నారు. తమిళ బిగ్ బాస్ లో పాల్గొనటం ద్వారా ఈ పంబాజీ ఫ్యామిలీ నటి పేరు ప్రఖ్యాతుల్ని సొంతం చేసుకున్నారు. ఐదేళ్ల క్రితం (2016లో) దురవంగల్ పత్తినారు అనే మూవీతో కోలీవుడ్ లోకి ఎంట్రీ ఇచ్చారు. తర్వాత అడల్ట్ కామెడీ చిత్రాలతో ఆమె క్రేజీ స్టార్ గా మారారు.
బిగ్ బాస్ 2లో ఆమె పాల్గొన్నారు. దీంతో.. తమిళనాడు వ్యాప్తంగా ఆమె సుపరిచితురాలయ్యారు. కేసు నమోదు చేసిన పోలీసులు దర్యాప్తు జరుపుతున్నారు. ఇదిలా ఉంటే.. ఆమె వెంటనే కోలుకోవాలని.. గండం నుంచి బయటపడాలని అభిమానులు కోరుకుంటున్నారు.
