తెలంగాణ‌లో రోజురోజుకూ బలహీనంగా మారుతున్న కాంగ్రెస్ పార్టీలో జ‌వ‌స‌త్వాలు నింపేందుకు.. స‌రికొత్త ఉత్సాహాన్ని తెచ్చే దిశ‌గా మ‌ల్కాజిగిరి ఎంపీ రేవంత్ రెడ్డిని పీసీసీ అధ్య‌క్షుడిగా అధిష్ఠానం ప్ర‌క‌టించింది. ఈ నిర్ణ‌యంతో రాష్ట్రంలో కాంగ్రెస్ పార్టీ తిరిగి పుంజుకుంటుంద‌నే న‌మ్మ‌కంతో డిల్లీ పెద్ద‌లున్నారు.
మ‌రోవైపు రేవంత్ రెడ్డి నియామ‌కంపై అన్ని వ‌ర్గాల నుంచి హ‌ర్షాతిరేకాలు వ్య‌క్త‌మ‌వుతున్నాయి. ప‌లువురు ప్ర‌ముఖులు ఆయ‌న‌కు శుభాకాంక్ష‌లు తెలుపుతున్నారు.
ఇక ఎప్పుడూ వివాదాస్ప‌ద వ్యాఖ్య‌లు చేస్తూ వార్త‌ల్లో నిలిచే ద‌ర్శ‌కుడు రామ్‌గోపాల్ వ‌ర్మ కూడా రేవంత్‌పై ప్ర‌శంస‌లు కురిపించ‌డం విశేషం. రేవంత్ సింహం లాంటి వ్య‌క్తి అని కొనియాడుతూ.. ఆర్జీవీ ట్వీట్లు చేశారు. రేవంత్ నియామ‌కంతో చాలా కాలం త‌ర్వ‌తా త‌న‌కు కాంగ్రెస్ పార్టీ మీద మ‌ళ్లీ ఆస‌క్తి క‌లిగింద‌ని ఆర్జీవీ పేర్కొన్నారు.
”అధ్య‌క్షుడిగా రేవంత్ రెడ్డిని నియ‌మించ‌డం ద్వారా ఎట్ట‌కేల‌కు కాంగ్రెస్ పార్టీ ఓ అత్య‌ద్భుత‌మైన నిర్ణ‌యం తీసుకుంది. సింహం లాంటి రేవంత్‌ను చూసి పులుల‌న్నీ ఇక భ‌య‌ప‌డ‌తాయి. ఈ నిర్ణ‌యంతో కాంగ్రెస్ పార్టీపై చాలా కాలం త‌ర్వాత తిరిగి ఆస‌క్తి క‌లిగింది. హేయ్.. రాహుల్ గాంధీ.. నువ్వు, మీ అమ్మ క‌లిగి చాలా మంచి ప‌ని చేశారు” అని ఆర్జీవీ త‌న ట్వీట్ల‌లో పేర్కొన్నారు.
