తెలుగు చలనచిత్ర పరిశ్రమలో ఉన్న స్టార్ డైరెక్టర్స్ లో సుకుమార్ ఒకరు. పుష్ప ది రైస్ చిత్రంతో జాతీయ స్థాయిలో గుర్తింపు పొందిన సుకుమార్.. త్వరలోనే పుష్ప 2 తో ఇండియన్ బాక్సాఫీస్ ను మరోసారి షేక్ చేయడానికి సిద్ధమవుతున్నారు. అయితే ఈ లోపే సుకుమార్ ఇంట ఒక హ్యాపీ మూమెంట్ చోటు చేసుకుంది. తమ పని మనిషి సాధించిన ఘనతకు సుకుమార్ మరియు ఆయన సతీమణి తబిత ఆనందంతో ఉప్పొంగి పోతున్నారు.
పూర్తి వివరాల్లోకి వెళితే.. పైన ఫోటోలో సుకుమార్ దంపతులతో పాటు కనిపిస్తున్న అమ్మాయి పేరు దివ్య. చాలా కాలం నుంచి సుకుమార్ ఇంట్లో పని చేస్తోంది. చ‌దువుల‌పై మ‌క్కువ క‌లిగి ఉన్న దివ్య‌ను సొంత ఖ‌ర్చుల‌తో సుకుమార్ చ‌దివించారు. ఇటీవ‌లె తన పైచ‌దువులు పూర్తి చేసిన దివ్య.. ఏకంగా ప్రభుత్వ ఉద్యోగాన్ని సాధించింది. దీంతో సుకుమార్- తబిత దంప‌తుల ఆనందానికి అవ‌ధులు లేకుండా పోయాయి.
తాజాగా తబిత ఈ విష‌యాన్ని సోష‌ల్ మీడియా ద్వారా పంచుకుంది. త‌మ‌తో క‌లిసి జీవించ‌డానికి, త‌మ‌కు స‌హాయం చేయడానికి వ‌చ్చిన అమ్మాయి చదువుకుని ప్రభుత్వ ఉద్యోగానికి ఎంపిక కావ‌డం మా హృదయాల‌కు ఎనలేని ఆనందాన్ని అందించింది. దివ్య తన ఉజ్వల భవిష్యత్తు కోసం రెక్కలు విప్పి పైపైకి ఎగరడం చూస్తుంటే చాలా సంతోషంగా, గ‌ర్వంగా ఉంది. దివ్య ఇంకా ఎత్తుకు ఎద‌గాలి. తన కలల కోసం ఈ కొత్త ప్రయాణాన్ని ప్రారంభించినందుకు దివ్య‌కు ప్ర‌త్యేక అభినంద‌న‌లు అంటూ సుకుమార్ సతీమణి తబిత ఇన్‌స్టాలో పోస్ట్ పెట్టారు. ఈ పోస్ట్ కు మంచి రెస్పాన్స్ వ‌స్తోంది. పని మ‌నిషిని కూడా సొంత మ‌నిషిలా చూసుకుంటున్న సుకుమార్ దంప‌తుల‌పై నెటిజ‌న్లు ప్ర‌శంస‌ల వ‌ర్షం కురిపిస్తున్నారు.
View this post on Instagram
