రానా కు క్లాస్ పీకిన హ‌రీష్ శంక‌ర్‌.. అసలేం జ‌రిగింది..?

ఇండియ‌న్ సినీ పరిశ్రమ ప్రతిష్టాత్మకంగా భావించే ఇంటర్నేషనల్ ఇండియన్ ఫిలిం అవార్డ్స్ (ఐఫా) వేడుక అబుదాబిలో అట్ట‌హాసంగా జ‌రిగిన సంగ‌తి తెలిసిందే. టాలీవుడ్ యాక్ట‌ర్స్‌ రానా దగ్గుబాటి, తేజ సజ్జ హోస్ట్‌లుగా వ్య‌వ‌హ‌రించిన ఈ అవార్డ్స్ ఫంక్ష‌న్ లో టాలీవుడ్ నుంచి బాలీవుడ్ వ‌ర‌కు అన్ని సినీ ప‌రిశ్ర‌మ‌ల నుంచి ప‌లువురు స్టార్స్ హాజ‌రై సంద‌డి చేశారు. అయితే ఐఫా వేడుక‌లో రానా ద‌గ్గుబాటి చేసిన కొన్ని కామెంట్స్ వివాస్ప‌దం అయ్యాయి.

వేదిక‌పై త‌న‌దైన హోస్టింగ్ మ‌రియు కామెడీ టైమింగ్ తో అతిథుల‌ను అల‌రించిన రానా.. ప‌లు సంద‌ర్భాల్లో లిమిట్స్ క్రాస్ చేసి పంచ్‌లు వేశాడు. ఈ క్ర‌మంలోనే పుష్ప-2, ఆదిపురుష్ తో పాటు మాస్ మ‌హారాజా ర‌వితేజ, డైరెక్ట‌ర్‌ హ‌రీష్ శంక‌ర్ కాంబినేష‌న్ లో ఇటీవ‌ల విడుద‌లై డిజాస్ట‌ర్ గా నిలిచిన‌ `మిస్ట‌ర్ బ‌చ్చ‌న్`పై రానా సెటైర్స్ వేశాడు. `బచ్చన్ గారు ఈ ఏడాది హైయెస్ట్ హై.. లోయెస్ట్ లో చూశారు` అని రానా అనగా.. పక్కనే ఉన్న తేజ `హైయెస్ట్ హై కల్కి.. మరి లోయెస్ట్ లో ఏంటి?` అని ప్రశ్నించాడు.

అందుకు రానా ఇంకొంచెం వెటకారంగా `అదే మొన్న రిలీజైంది కదా.. మిస్టర్….? ` అంటూ సాగదీశాడు. దాంతో ఇంక చెప్పొద్దని తేజ అడ్డుకున్నాడు. ఇందుకు సంబంధించిన వీడియో నెట్టింట వైర‌ల్ గా మార‌డంతో.. ఓ అభిమాని డైరెక్ట‌ర్ హ‌రీష్ శంక‌ర్ కు ఆ వీడియో ట్యాగ్ చేశాడు. రానా సెటైరిక‌ల్ కామెంట్స్ ప‌ట్ల ఆగ్ర‌హించిన హ‌రీష్ శంక‌ర్‌.. `ఎన్నో విన్నాను తమ్ముడు.. అందులో ఇదోటి. అన్ని రోజులు ఒకేలా ఉండవు. నాకైనా.. ఎవరికైనా..` అంటూ హీరో గారికి ప‌రోక్షంగా క్లాస్ పీకారు. ప్ర‌స్తుతం హ‌రీష్ శంక‌ర్ ట్వీట్ వైర‌ల్ అవుతోంది.

#IIFAUtsavam2024 #tejasajja & #RanaDaggubati Roast 🤣🤣#Pushpa2TheRule #MrBachchan #Adipurush pic.twitter.com/34XmKDB6pv

— CINE EXPLORERS (@CINE_EXPLORERS) November 5, 2024