అప్పుడప్పుడూ కొన్ని హాలీవుడ్ సినిమాలు ఇండియన్ బాక్సాఫీస్‌ను ముంచెత్తుతుంటాయి. అవి వచ్చినపుడు లోకల్ సినిమాలను కూడా ప్రేక్షకులు పెద్దగా పట్టించుకోరు. ముఖ్యంగా పిల్లల్లో ఆసక్తి రేకెత్తించే సినిమాలు వస్తే వాటికి ఆదరణ గొప్పగా ఉంటుంది. డిస్నీ వారి ‘ముఫాసా’ కూడా ఈ కోవకు చెందిన సినిమానే. జంతువులు మామూలు మనుషుల్లా మాట్లాడ్డం.. వాటి మధ్య ఒక డ్రామా నడవడం.. వాటిలో హీరో విలన్ ఉండి ఇద్దరి మధ్య పతాక స్థాయి పోరు జరగడం.. ఇలాంటివి తెర మీద చూడ్డానికి చాలా గమ్మత్తుగా ఉంటుంది. ముఫాసా కూడా ఈ కోవకు చెందిన చిత్రమే. హాలీవుడ్లో ఒకటికి రెండుసార్లు మెప్పించిన ‘లయన్ కింగ్’ మూవీలో కీలకమైన రాజసింహం ‘ముఫాసా’ను లీడ్‌గా తీసుకుని చేసిన చిత్రమిది. డిసెంబరు 20న ఈ చిత్రం ప్రపంచవ్యాప్తంగా ప్రేక్షకుల ముందుకు రానుంది.
తెలుగులో కూడా ఈ సినిమా మీద మంచి అంచనాలుండగా.. దానికి మరింత ఆకర్షణ పెంచుతూ లీడ్ రోల్‌కు సూపర్ స్టార్ మహేష్ బాబుతో వాయిస్ ఇప్పిస్తున్నారు. మహేష్ ముఫాసా పాత్రకు వాయిస్ ఇస్తాడని ఇంకతుముందే ప్రచారం జరిగింది. ఇప్పుడా విషయాన్ని అధికారికంగా ప్రకటించారు. మహేష్ స్థాయి స్టార్ ఈ పాత్రకు వాయిస్ ఇచ్చాడంటే సినిమాకు ఆకర్షణ డబులవుతుందనడంలో సందేహం లేదు.
ఇంతకుముందు ‘లయన్ కింగ్’లో యువరాజు సింబా పాత్రకు నాని, ముఫాసా పాత్రకు రవిశంకర్, విలన్ పాత్రకు జగపతిబాబు వాయిస్ ఇచ్చారు. సినిమాకు వారి వాయిస్‌లు ఆకర్షణగా మారాయి. కాగా ఇప్పుడు ఏకంగా మహేష్ బాబు లీడ్ పాత్రకు గాత్రదానం చేస్తున్నాడు కాబట్టి సినిమాపై అంచనాలు ఇంకా పెరుగుతాయి. మహేష్ ఫ్యాన్స్ అందరూ ఈ సినిమా చూడ్డానికి ఆసక్తి చూపిస్తారనడంలో సందేహం లేదు. మరి హిందీ, ఇతర భాషల కోసం కూడా వేరే స్టార్లను సంప్రదిస్తారేమో చూడాలి.
