గ్లామర్ ప్రపంచం అంత సిత్రమైనది మరొకటి కనిపించదు. ఎప్పుడు ఎలాంటి పరిణామాలు చోటు చేసుకుంటాయో అంచనా వేయలేం. సదూర ఉన్న నక్షత్రాలు ఎలా అయితే మెరిసిపోతుంటాయి.. సామాన్యులకు సదూరంగా ఉండే సినీ తారలు మెరుస్తుంటారే కానీ.. వారి మెరుపులకు దరిదాపుల్లోకి కూడా వెళ్లలేని స్థితి ఉంటుంది. అదే సమయంలో ఆ తారల్లో కొందరి వ్యక్తిగత జీవితాలు ఊహకు అందనంత దారుణంగా ఉంటాయి. ఏం జరిగిందో తెలీదు కానీ అనుమానాస్పద స్థితిలో మరణించిన బాలీవుడ్ నటి నూర్ మాలబికా దాస్ పరిస్థితి దారుణంగా మారింది.
ఆమె నివాసం ఉంటున్న ప్లాట్ నుంచి దుర్వాసన రావటంతో ఆమె మరణం గురించిన సమాచారం ఆలస్యంగా బయటకు వచ్చింది. ముంబయిలోని ఆమె ప్లాట్ లో అనుమానాస్పద స్థితిలో మరణించిన ఆమె బాడీ ఇప్పుడు కుళ్లిన స్థితిలో ఉంది. అసోంకు చెందిన నూర్ మాలబికా దాస్.. సినీ నటిగా సుపరిచితురాలు. ఆమె ఖతర్ ఎయిర్ వేస్ లో ఎయిర్ హోస్టెస్ గా పని చేశారు.
తర్వాతి కాలంలో సినిమాల మీద ఆసక్తితో ముంబయికి వచ్చిన ఆమె.. పలు చిత్రాల్లోనూ.. వెబ్ సిరీస్ లోనూ నటించారు. ప్రముఖ బాలీవుడ్ నటి కాజోల్ నటించిన ది ట్రయల్ సిరీస్ తో పాటు పలు వెబ్ షోల్లో నటించారు. ఆమె నివాసం ఉంటున్ ప్లాట్ నుంచి దుర్వాసన రావటంతో ఇరుగుపొరుగు వారు అందించిన సమాచారంతో రంగంలోకి దిగిన పోలీసులు ప్లాట్ తలుపులు పగలగొట్టి లోపలకు వెళ్లారు. ఆమె డెడ్ బాడీ కుళ్లిన స్థితిలో ఉంది.
ప్రాధమికంగా లభించిన సమాచారంతో ఆమె ఆత్మహత్య చేసుకొని ఉండొచ్చని పోలీసులు అనుమానిస్తున్నారు. పెద్ద వయస్కులైన ఆమె తల్లిదండ్రులు ముంబయికి వచ్చి వెళ్లారు. కుమార్తె డెడ్ బాడీని తీసుకెళ్లలేమని స్పష్టం చేశారు. దీంతో ఆమె స్నేహితుడు కం నటుడు అయిన అలోక్ నాథ్ పాఠక్ ఒక ఎన్జీవో సాయంతో అంత్యక్రియల్ని పూర్తి చేశారు. ఆమె మరణంపై సమగ్ర విచారణ జరిపించాలని ఆల్ ఇండియన్ సినీ వర్కర్స్ అసోసియేషన్ ప్రభుత్వాన్ని కోరింది.
