ఏపీలో పోలింగ్ సరళిపై జనసేన అధినేత పవన్ కళ్యాణ్ ఆసక్తికర వ్యాఖ్యలు చేశారు. వైసీపీ ప్రభుత్వంపై ఉన్న వ్యతిరేకతకు పోలింగ్ కేంద్రాలకు భారీగా తరలివచ్చిన ఓటర్లే నిదర్శనమని పవన్ కళ్యాణ్ అభిప్రాయపడ్డారు. మంగళగిరిలో తన భార్య అన్న లెజినోవాతో కలిసి ఓటు హక్కును వినియోగించుకున్న పవన్ కళ్యాణ్ కీలక వ్యాఖ్యలు చేశారు. ఏపీలో ఎన్డీఏ కూటమి ఘనవిజయం సాధించబోతోందని, తాము ప్రభుత్వం ఏర్పాటు చేయబోతున్నామని పవన్ కళ్యాణ్ ధీమా వ్యక్తం చేశారు. పిఠాపురంలో తనకు మంచి మెజారిటీ వస్తుందని ఆశాభావం వ్యక్తం చేశారు.
మరోవైపు, మే 14న వారణాసిలో ప్రధాని నరేంద్ర మోడీ నామినేషన్ కార్యక్రమానికి పవన్ కళ్యాణ్ కి కూడా ఆహ్వానం అందింది. ఈ నేపథ్యంలోనే ఆయన సతీసమేతంగా వారణాసి బయలుదేరారు. ప్రధాని మోడీకి తన మద్దతు అందించి శుభాకాంక్షలు తెలిపిందుకే వారణాసి వెళ్తున్నానని పవన్ అన్నారు. మోడీ హ్యాట్రిక్ ప్రధాని అవుతారని జోస్యం చెప్పారు. ప్రధాని మోడీ నామినేషన్ కార్యక్రమానికి తనకు ఆహ్వానం రావడం తనకు లభించిన గౌరవంగా భావిస్తున్నానని అన్నారు.
