వైసీపీ సీనియర్ నేత, మంత్రి ధర్మాన ప్రసాద రావు రూటే సపరేటు. మనసులో ఉన్నది బయటకు చెప్పేయడం…జనంలో ఉన్నా…మన మనుషుల మధ్య ఉన్నా..ఒకేలా మాట్లాడడం ధర్మాన నైజం. ఏ రాజకీయ నాయకుడైనా పొరపాటు ఒకసారో..రెండు సార్లో టంగ్ స్లిప్ కావడం సహజం. కానీ, ధర్మాన మాత్రం పదే పదే తన పార్టీని ఇరుకున పడేసేలా వ్యాఖ్యానించడం చూస్తుంటే మాత్రం అది టంగ్ స్లిప్ కాదని అర్థం చేసుకోవచ్చు. ఈ క్రమంలో తనదైన శైలిలో మరోసారి వైసీపీని ధర్మాన ఇరుకున పడేశారు.
వైసీపీ గుర్తు ఏంటో చాలామంది జనానికి తెలియదని ధర్మాన చేసిన కామెంట్లు వైరల్ గా మారాయి. ఎన్నికల ప్రచారానికి వెళ్లినప్పుడు ఏ పార్టీకి ఓటు వేస్తారు అని ప్రజలను అడిగితే హస్తం గుర్తు అని, సైకిల్ గుర్తు అని అంటున్నారని ధర్మాన ఆవేదన వ్యక్తం చేశారు. శ్రీకాకుళంలోని బెండవానిపేటలో వైసీపీ శ్రీకాకుళం లోక్‌సభ అభ్యర్థి పేరాడ తిలక్‌తో కలిసి ఎన్నికల ప్రచారం నిర్వహించిన సందర్భంగా ధర్మాన ఈ వ్యాఖ్యలు చేశారు.
ఎన్నికల యుద్ధానికి వైసీపీ నేతలంతా సిద్ధమవుతున్నారని, అయితే, చాలామంది ప్రజలకు పార్టీ గుర్తు ఏంటో తెలియదని అన్నారు. ఏ పార్టీకి ఓటేస్తారని అడిగితే చాలామంది బాబుకే వేస్తామని చెబుతున్నారని అసహనం వ్యక్తం చేశారు. ఏ బాబుకు ఓటేస్తారని అడిగితే హస్తం, సైకిల్ అంటున్నారని విచారం వ్యక్తం చేశారు.
తాజాగా ధర్మాన చేసిన వ్యాఖ్యలు వైరల్ గా మారాయి. వైసీపీ ఫ్యాన్ గుర్తు చాలామంది జనాలకు నోటెడ్ కాదని ధర్మాన అంగీకరించారని సోషల్ మీడియాలో నెటిజన్లు కామెంట్లు పెడుతున్నారు. అందుకే, జగన్ ఎక్కడకు వెళ్లినా..డమ్మీ ఫ్యాన్ పట్టుకొని ఫ్యాన్ గుర్తును ప్రమోట్ చేస్తుంటారని, ఈ విషయం ధర్మానకు ఆలస్యంగా తెలిసిందని సెటైర్లు వేస్తున్నారు. ధర్మానకు ఫ్యాన్ గుర్తు గుబులు పుట్టిందని అంటున్నారు.
