సందీప్ రెడ్డి వంగ.. ప్రస్తుతం ఇండియాలో మోస్ట్ వాంటెడ్ డైరెక్టర్లలో ఒకడు. ‘అర్జున్ రెడ్డి’ లాంటి సంచలన చిత్రంతో దర్శకుడిగా పరిచయం అయిన సందీప్.. దాని రీమేక్ ‘కబీర్ సింగ్’తో బాలీవుడ్లో ప్రకంపనలు రేపాడు. ఇక తర్వాతి చిత్రం ‘యానిమల్’తో అతను రేపిన సంచలనం గురించి ఎంత చెప్పినా తక్కువే.
మొత్తంగా అతను తెరకెక్కించింది రెండు కథలే అయినా.. అతను బాక్సాఫీస్‌లో రేపిన ప్రకంపనల గురించి ఎంత చెప్పినా తక్కువే. ‘యానిమల్’కు కొనసాగింపుగా ‘యానిమల్ పార్క్’ సినిమాను కూడా ప్రకటించిన సందీప్.. దాని కంటే ముందు ప్రభాస్‌తో ‘స్పిరిట్’ చేయాల్సి ఉంది. ఐతే ఆ సినిమా ఆలస్యమవుతుందని.. ‘యానిమల్ పార్క్’ను ముందు తెరకెక్కిస్తాడని వార్తలు వచ్చాయి. ఈ వార్తలను తాజాగా సందీప్ ఖండించాడు.
తన తర్వాతి చిత్రం ‘స్పిరిట్’యే అని.. దాని స్క్రిప్ట్ మీద ప్రస్తుతం పని చేస్తున్నానని తెలిపాడు. ఇక ‘స్పిరిట్’ అనే పేరు చూసి కొందరు ఇది హార్రర్ సినిమా ఏమో అనుకుంటుండగా.. ఆ ప్రచారంలో వాస్తవం లేదని సందీప్ క్లారిటీ ఇచ్చాడు. ఈ చిత్రంలో ప్రభాస్ పోలీస్ పాత్ర చేస్తున్న విషయాన్ని అతను ధ్రువీకరించాడు. దీంతో తొలిసారి కెరీర్లో ప్రభాస్‌ను ఖాకీ దుస్తుల్లో చూడబోతున్నామని.. ప్రభాస్ కటౌట్‌కు ఆ పాత్ర అదిరిపోతుందని అభిమానులు సంబరపడుతున్నారు.
‘స్పిరిట్’లో మునుపెన్నడూ చూడని ప్రభాస్‌ను చూడబోతారని ఇంతకుముందే సందీప్ రెడ్డి వ్యాఖ్యానించాడు. ‘అర్జున్ రెడ్డి’ దగ్గర్నుంచి సందీప్ రెడ్డితో కలిసి ప్రయాణం సాగిస్తున్న హర్షవర్ధన్ రామేశ్వర్ ఈ చిత్రానికి సంగీతం సమకూరుస్తుండగా.. కబీర్ సింగ్, యానిమల్ చిత్రాల నిర్మాత భూషణ్ కుమారే ఈ మూవీని కూడా ప్రొడ్యూస్ చేయబోతున్నాడు.
