ఈ రోజు హైదరాబాద్‌లో ఒక సినిమా ఈవెంట్ హాట్ టాపిక్ కాబోతోంది. తెలంగాణ ఎన్నికల ప్రచారం పతాక స్థాయికి చేరిన ఈ సమయంలో కొన్ని గంటల పాటు రాజకీయాలు పక్కకు వెళ్లిపోయి మీడియా, సోషల్ మీడియా ఆ ఈవెంట్ మీదే ఫోకస్ పెడితే ఆశ్చర్యం లేదు. ఈ శుక్రవారం రిలీజ్ కాబోతున్న యానిమల్ మూవీకి సంబంధించిన ఈవెంట్ అది. మామూలుగానే సినిమాకు బంపర్ క్రేజ్ ఉండగా.. మల్లారెడ్డి ఇంజినీరింగ్ కాలేజీలో జరిగే ప్రి రిలీజ్ ఈవెంట్‌కు రాజమౌళి, మహేష్ బాబు ముఖ్య అతిథులుగా రాబోతుండటంతో హైప్ ఇంకా ఇంకా పెరిగేలా కనిపిస్తోంది.
ఇది ‘యానిమల్’ సినిమాకు సంబంధించిన ఈవెంట్ అయినా.. వేరే విషయాల మీద ఇందులో ఎక్కువ చర్చ జరిగితే ఆశ్చర్యం లేదు. రాజమౌళి, సందీప్ రెడ్డి వంగలతో తాను చేయాల్సిన సినిమాల గురించి మహేష్ బాబు ఏం మాట్లాడతాడు.. అలాగే ఆ ఇద్దరూ ఈ ప్రాజెక్టుల గురించి ఏం మాట్లాడతారు అన్నదే అత్యంత ఆసక్తి రేకెత్తిస్తోంది. రాజమౌళితో మహేష్ సినిమా ఆల్రెడీ ఓకే అయింది. వచ్చే ఏడాది అది సెట్స్ మీదికి వెళ్లబోతోంది. ఐతే సినిమా ఎప్పుడో ఓకే అయింది, ఇదొక‘ఇండియానా జోన్స్’ తరహా అడ్వెంచరస్ థ్రిల్లర్ అనే సంకేతాలు తప్ప ఈ ప్రాజెక్టు గురించి ఎవరూ ఏమీ మాట్లాడట్లేదు.
అలాగే సినిమా ఏ దశలో ఉంది.. సరిగ్గా ఎప్పుడు సెట్స్ మీదికి వెళ్తుంది అన్న విషయాలపైనా క్లారిటీ లేదు. ఈ ఈవెంట్లో మహేష్, రాజమౌళి తమ చిత్రం గురించి ఏం మాట్లాడతారన్నది ఆసక్తికరం. ఈవెంట్‌కు వచ్చే అభిమానులందరూ కూడా అప్‌డేట్స్ కోసం అరవడం ఖాయం. ఇక సందీప్ రెడ్డితో మహేష్ ప్రాజెక్టు ఎప్పుడు ఉంటుందా అన్న ఆసక్తి కూడా అభిమానుల్లో ఉంది. గతంలో మహేష్‌కు సందీప్ ఒక కథ చెప్పినా అది కార్యరూపం దాల్చలేదు. మరి ఈ కలయికలో ఎప్పటికైనా సినిమా వస్తుందా.. ఆ దిశగా ఏమైనా సంకేతాలు ఇస్తారా అని కూడా ఫ్యాన్స్ ఎదురు చూస్తున్నారు. ఈ ఇద్దరూ ఒకరి గురించి ఒకరేం మాట్లాడతారన్నది కూడా ఆసక్తికరమే.
