ఓవైపు కమర్షియల్ సినిమాల్లో గ్లామర్ క్యారెక్టర్లు చేస్తూనే.. ఇంకోవైపు పెర్ఫామెన్స్ ఓరియెంటెడ్ రోల్స్ ఉన్న సినిమాలు, లేడీ ఓరియెంటెడ్ చిత్రాల్లో నటిస్తూ తన ప్రత్యేకతను చాటుకుంటోంది కీర్తి సురేష్. గత ఏడాది ఆమె సర్కారు వారి పాట లాంటి ఫక్తు కమర్షియల్ సినిమాలోనూ మెప్పించింది. అలాగే ఈ ఏడాది ‘దసరా’లో ఒక వైవిధ్యమైన పాత్రలోనూ ఆకట్టుకుంది.
ఇంకా ‘సాని కాయిదం’లో ఒక సెన్సేషనల్ క్యారెక్టర్‌లోనూ అదరగొట్టింది. ప్రస్తుతం ‘రివాల్వర్ రీటా’ అనే లేడీ ఓరియెంటెడ్ సినిమా చేస్తూనే మరి కొన్ని చిత్రాల్లోనూ నటిస్తోంది కీర్తి. త్వరలోనే ఆమె ఒక బాలీవుడ్ వెబ్ సిరీస్‌లో నటించబోతున్నట్లు సమాచారం. బహు భాషల్లో తెరకెక్కే ఆ చిత్రానికి తెలుగులో ‘అక్క’ అనే టైటిల్ అనుకుంటున్నారట. యశ్ రాజ్ ఫిలిమ్స్ బేనర్లో ఆదిత్య చోప్రా ఈ చిత్రాన్ని నిర్మించబోతున్నారట.
ఓ వైపు పఠాన్, టైగర్-3 లాంటి భారీ ఫీచర్ ఫిలిమ్స్ తీస్తూనే.. మరోవైపు వెబ్ సిరీస్‌లు కూడా నిర్మిస్తోంది యశ్ రాజ్ ఫిలిమ్స్. ఆ సంస్థ నుంచి రాబోతున్న కొత్త వెబ్ సిరీస్‌లో కీర్తి ముఖ్య పాత్ర పోషించనుందట. ఇందులో రాధికా ఆప్టే సైతం ఓ ప్రధాన పాత్ర పోషిస్తోంది. ఈ సిరీస్‌ను ధర్మరాజ్ అనే కొత్త దర్శకుడు రూపొందించనున్నాడు. కీర్తి ఇప్పటిదాకా డిజిటిల్ డెబ్యూ చేయలేదు. ఇదే ఆమెకు తొలి వెబ్ సిరీస్ కానుంది.
సౌత్ ఇండియన్ హీరోయిన్లలో వెబ్ సిరీస్‌ల్లో నటించిన స్టార్ హీరోయిన్లు తక్కువమందే. ఇక్కడ హీరోల మాదిరే హీరోయిన్లు కూడా వెబ్ సిరీస్‌ల్లో నటించడానికి అంతగా ఉత్సాహం చూపించట్లేదు. కాజల్ అగర్వాల్, తమన్నా, నిత్యా మీనన్ లాంటి కొద్దిమందే వెబ్ సిరీస్‌లు చేశారు. ఇప్పుడు కీర్తి లాంటి హ్యాపెనింగ్ హీరోయిన్ వెబ్ సిరీస్ చేయనుండటం ఆసక్తి రేకెత్తించే విషయమే. త్వరలోనే ఈ ప్రాజెక్టు గురించి అధికారిక ప్రకటన రానుంది.
