టీడీపీ అధినేత చంద్రబాబు అరెస్టు నేపథ్యంలో సెప్టెంబర్ 9న టీడీపీ జాతీయ ప్రధాన కార్యదర్శి నారా లోకేష్ చేపట్టిన పాదయాత్ర ఆగిపోయిన సంగతి తెలిసిందే. చంద్రబాబు అరెస్టు తదనంతర పరిణామాల నేపథ్యంలో లోకేష్ తన పాదయాత్రను వాయిదా వేసుకున్న సంగతి తెలిసిందే. అయితే, ఎన్నికలకు మరికొద్ది నెలల సమయం మాత్రమే ఉండడంతో పాదయాత్రను పూర్తి చేయాలని లోకేష్ భావిస్తున్నారు. ఈ క్రమంలోనే తాజాగా ఈ నెల 24వ తేదీ నుంచి యువగళం పున: ప్రారంభం చేయనున్నారని తెలుస్తోంది.
గతంలో చంద్రబాబు ముగించిన విధంగానే విశాఖలో పాదయాత్రను ముగించాలని లోకేష్ యోచిస్తున్నట్లు తెలుస్తోంది. పాదయాత్ర నిలిచిపోయిన చోట నుంచి తిరిగి ప్రారంభించాలని లోకేష్ నిర్ణయించారని తెలుస్తోంది. ముందుగా అనుకున్న ప్రకారం కాకుండా ఎన్నికల నేపథ్యంలో యువగళ: పాదయాత్రను కుదించే యోచనలో పార్టీ వర్గాలు ఉన్నట్టు తెలుస్తోంది. ఈ విషయాలపై అధికారికంగా ప్రకటన వెలువడాల్సి ఉంది.
