ప్రస్తుతం బాలీవుడ్లో తెరకెక్కుతున్న చిత్రాల్లో అత్యంత అంచనాలున్న వాటిలో ‘యానిమల్’ ఒకటి. మామూలుగా హిందీ చిత్రాలకు దక్షిణాదిన కొన్ని సిటీస్‌లో మాత్రమే హైప్ ఉంటుంది. కానీ ‘యానిమల్’ అలా కాదు. ‘అర్జున్ రెడ్డి’ తీసిన సందీప్ రెడ్డి వంగ.. రణబీర్ కపూర్ లాంటి టాప్ స్టార్‌తో చేస్తున్న సినిమా కావడంతో ‘యానిమల్’ కోసం దేశమంతా ఎంతో ఆసక్తిగా ఎదురు చూస్తోంది. ఇంతకుముందు ఈ సినిమా నుంచి రిలీజ్ చేసిన ప్రి టీజర్ సహా అన్ని ప్రోమోలూ సినిమా మీద అంచనాలను ఇంకా పెంచాయి.
ఏడాది కిందటే విడుదల కావాల్సిన ‘యానిమల్’ షూట్ ఆలస్యం వల్ల వాయిదా పడుతూ డిసెంబరు 1కి షెడ్యూల్ అయింది. విడుదలకు అటు ఇటుగా ఇంకో 70 రోజులే ఉండటంతో ప్రమోషన్ల పరంగా జోరు చూపించాల్సిన అవసరం ఏర్పడింది. ఈ నేపథ్యంలోనే ‘యానిమల్’ టీజర్ లాంచ్‌కు రంగం సిద్ధం చేశాడు దర్శక నిర్మాత సందీప్ వంగ. ‘యానిమల్’ టీజర్ ఈ నెల 28న ఉదయం 10 గంటలకు విడుదల కాబోతంది. వినాయక చవితిని పురస్కరించుకుని ఈ విషయాన్ని ఒక స్ట్రైకింగ్ పోస్టర్ ద్వారా వెల్లడించారు.
ఆ పోస్టర్లో రణబీర్ సూపర్ స్టైలిష్‌గా కనిపిస్తూ అభిమానుల దృష్టిని ఆకర్షిస్తున్నాడు. ‘అర్జున్ రెడ్డి’ లాగే ఈ సినిమా కూడా బోల్డ్‌గా ఉంటుందని.. ఇందులో వయొలెన్స్ డోస్ కూడా బాగానే ఉంటుందని ఇప్పటిదాకా రిలీజైన ప్రోమోలను బట్టి అర్థమైంది. తాజా పోస్టర్ సినిమా స్టైలిష్‌గా ఉంటుందనే సంకేతాలు ఇచ్చింది. ప్రి టీజర్‌తో ఆశ్చర్యపరిచిన సందీప్.. టీజర్‌లో ఇంకెన్ని మెరుపులు చూపిస్తాడా అని ఎదురు చూస్తున్నారు ప్రేక్షకులు. సందీప్ మార్కుతో టీజర్ సాగితే సినిమాకు ఇంకా హైప్ పెరగడం ఖాయం. ‘సలార్’ టీజర్ తర్వాత ప్రేక్షకులు అత్యంత ఉత్కంఠతో ఎదురు చూసే టీజర్ ఇదే అవుతుందనడంలో సందేహం లేదు. రష్మిక మందన్నా కథానాయికగా నటిస్తున్న ఈ చిత్రంలో అనిల్ కపూర్ ముఖ్య పాత్ర పోషించాడు.
