కొన్ని రోజుల కిందట మంచు విష్ణు తన డ్రీమ్ ప్రాజెక్టు అయిన ‘భక్త కన్నప్ప’ సినిమాను అనౌన్స్ చేయడం, ఈ సినిమాకు ముహూర్త వేడుక కూడా నిర్వహించడం చర్చనీయాంశం అయింది. మంచు విష్ణు కెరీర్ కొన్నేళ్లుగా ఎంత ఇబ్బందికరంగా సాగుతోందో తెలిసిందే. తన సినిమాలు వస్తున్నాయి. వెళ్తున్నాయి. బాక్సాఫీస్ దగ్గర కనీస ప్రభావం కూడా చూపించట్లేదు. ‘జిన్నా’ సినిమాకు పర్వాలేదన్న టాక్ వచ్చినా సరే.. వసూళ్లు లేక వెలవెలబోయింది. విష్ణు మార్కెట్ దారుణాతి దారుణంగా దెబ్బ తినేసిందనే విషయం స్పష్టం.
ఇలాంటి ట్రాక్ రికార్డున్న హీరో వంద కోట్లకు పైగా బడ్జెట్లో ‘భక్త కన్నప్ప’ సినిమా చేయనున్నట్లు ప్రకటించగానే అందరూ షాకయ్యారు. దీని మీద విపరీతమైన ట్రోలింగ్ కూడా జరిగింది సోషల్ మీడియాలో. విష్ణు ట్రాక్ రికార్డుకు తోడు మనకు పరిచయమే లేని ముకేష్ కుమార్ సింగ్ అనే దర్శకుడు ఈ సినిమాను తెరకెక్కిస్తుండటం కూడా ఈ సినిమాకు మైనస్ లాగా కనిపించింది. ఒక పెద్ద ప్రాజెక్టు ప్రకటించినపుడు జనాల్లో వచ్చే స్పందనను బట్టే దానికి హైప్ క్రియేట్ అవుతుంది. కానీ ‘భక్త కన్నప్ప’ విషయంలో ట్రోల్స్ తప్పితే.. పాజిటివ్ రియాక్షనే కనిపించలేదు ప్రేక్షకుల నుంచి. ఈ స్థితి నుంచి సినిమాకు ఎలా బజ్ క్రియేట్ చేస్తారో అనుకున్నారంతా. కానీ మంచు విష్ణు మాస్టర్ స్ట్రోక్ లాంటి అప్‌డేట్‌తో వచ్చాడు.
ప్రస్తుతం ఇండియాలోనే బిగ్గెస్ట్ హీరో అనదగ్గ ప్రభాస్ తన సినిమాలో క్యామియో చేయనున్నట్లు ప్రకటించాడు. దీంతో అందరూ ఈ సినిమా మీద ప్రత్యేకంగా దృష్టిసారించే పరిస్థితి కనిపిస్తోంది. నిజానికి ప్రభాస్ హీరోగా ‘భక్త కన్నప్ప’ను రీమేక్ చేయాలని అతడి పెదనాన్న, ఒకప్పటి ‘భక్త కన్నప్ప’ హీరో కృష్ణంరాజు అనుకున్నారు. కానీ అది కార్యరూపం దాల్చలేదు. ఈ కారణంతోనే మంచు విష్ణు ‘భక్త కన్నప్ప’ ప్రకటించినపుడు ప్రభాస్ అభిమానుల్లో కొంత వ్యతిరేకత కూడా కనిపించింది.
కానీ ఇప్పుడు ప్రభాసే క్యామియో చేస్తుండటంతో వాళ్లంతా సినిమాకు బాసటగా నిలిచే అవకాశముంది. ప్రభాస్ క్యామియోలో నటించినా సరే.. సినిమాకు వచ్చే హైప్ వేరుగా ఉంటుంది. ప్రభాస్‌ను ఎలా ఒప్పించాడో ఏమో కానీ.. ఈ న్యూస్‌తో సినిమాకు ఒక పాజిటివ్ బజ్ తీసుకురాగలిగాడు విష్ణు.
