టీడీపీ అగ్రనేత, నారా లోకేష్ చేపట్టిన యువగళం పాదయాత్ర దిగ్విజయంగా కొనసాగుతున్న సంగతి తెలిసిందే. వైసీపీ నేతలు ఎన్ని అడ్డంకులు సృష్టించినా మొక్కవోని దీక్షతో లోకేష్ తన పాదయాత్రను కొనసాగిస్తున్నారు. ఈ క్రమంలోనే లోకేష్ యువగళం పాదయాత్ర నేడు 100వ రోజుకు చేరుకుంది. ఈ సందర్భంగా రాష్ట్ర వ్యాప్తంగా టీడీపీ శ్రేణులు పలు కార్యక్రమాలను నిర్వహిస్తున్నాయి. 100 రోజుల్లో లోకేష్ 1200 కిలోమీటర్ల మేర పాదయాత్ర చేశారు.
100వరోజు పాదయాత్ర సందర్భంగా లోకేష్ ను నారా, నందమూరి కుటుంబ సభ్యులు కలిశారు. లోకేష్ వెంట ఉత్సాహంగా పాదయాత్రలో వారంతా పాల్గొన్నారు. నారా భువనేశ్వరితో పాటు లోకేశ్వరి, హైమావతి, ఇందిరా, నందమూరి జయశ్రీ, నందమూరి దేవన్, నందమూరి మణి, సిహెచ్ శ్రీమాన్ , సిహెచ్ చాముండేశ్వరి, గారపాటి శ్రీనివాస్, కంఠమనేని దీక్షిత, కంఠమనేని బాబి, రాహుల్ తదితరులు పాల్గొన్నారు. మరోవైపు లోకేష్ ను తెలంగాణ టిడిపి అధ్యక్షుడు కాసాని జ్ఞానేశ్వర్ తో పాటు సీనియర్ నేత రావుల చంద్రశేఖర్ రెడ్డి, తెలుగు మహిళా అధ్యక్షురాలు షకీలా రెడ్డి కలిసి శుభాకాంక్షలు తెలిపారు.
100 రోజుల పాదయాత్రకు గుర్తుగా శ్రీశైలం నియోజకవర్గం మోత్కూరులో లోకేష్ పైలాన్ ను ఆవిష్కరించారు. లోకేష్ పాదయాత్రలో భువనేశ్వరితో పాటు పలువురు ఉత్సాహంగా పాల్గొన్నారు. ఈ సందర్భంగా తన తల్లి భువనేశ్వరి షూ లేస్ ఊడడంతో లోకేష్ స్వయంగా కట్టారు. ప్రస్తుతం ఈ ఫోటో సోషల్ మీడియాలో వైరల్ గా మారింది.
