సౌత్ ఇండియాలోని స్టార్ హీరోయిన్లలో ఒకరిగా గుర్తింపు తెచ్చుకున్న హీరోయిన్ సమంత. ఇటీవల వరుస ప్లాప్ లతో సామ్ కొంత నిరాశకు గురైంది. ప్రయోగాత్మక చిత్రాలుగా తెరకెక్కిన యశోద, శాకుంతలం చిత్రాలు ఆశించిన స్థాయిలో విజయాలు అందుకోకపోవడంతో సమంత కాస్త డీలా పడినట్టు కనిపించింది. దీంతో, రౌడీ హీరో విజయ్ దేవరకొండతో కలిసి నటిస్తున్న ఖుషీ చిత్రంపైనే సమంత ఆశలన్నీ పెట్టుకుంది.
నిన్ను కోరి, మజిలీ వంటి ప్రేమకథా చిత్రాలతో ప్రశంసలు అందుకున్న శివ నిర్వాణ దర్శకత్వంలో విజయ్, సమంతలు నటిస్తున్నారు. విజయ్ కూడా లైగర్ డిజాస్టర్ నుంచి ఇప్పుడిప్పుడే కోల్కొని ఖుషీపైనే హోప్స్ పెట్టుకున్నాడు. ఈ క్రమంలోనే ఈ ఇద్దరికీ ఎంతో కీలకమైన ఈ చిత్రం నుంచి తాజాగా ఫస్ట్ లిరికల్ సాంగ్ ‘‘నా రోజా నువ్వే’’ ప్రోమో విడుదలైంది. ఈ ప్రోమోలో సమంత బుర్ఖా వేసుకొని ముస్లిం యువతిగా నమాజ్ చేస్తూ కనిపించింది.
ఆ పక్కనే కూర్చున్న విజయ్ దేవరకొండ నమాజ్ చేస్తున్న సమంతను అనుకరిస్తున్నట్టుగా కనిపించాడు. అయితే, గతంలో విడుదలైన ప్రోమోలో ఆరాధ్య అనే బ్రాహ్మణ అమ్మాయి పాత్రలో మెడలో తాళిబొట్టుతో సింపుల్ గా సామ్ కనిపించింది. కానీ, ఇప్పుడు ముస్లిం యువతిగా కనిపించడంతో సమంత పాత్రలో కచ్చితంగా ట్విస్టులు ఉండబోతున్నట్టుగా తెలుస్తోంది. కశ్మీర్ బ్యాక్ డ్రాప్ లో కొంత కథ నడిచేలా కనిపిస్తోంది. అయితే, మే 9న ఈ పాట ఫుల్ వెర్షన్ రిలీజ్ అయితే సమంత క్యారెక్టర్ పై క్లారిటీ వచ్చే అవకాశం ఉంది.
